Shymkenttegi «Himfarm» zaýytynda peroraldy qabyldaýǵa arnalǵan qatty dári-dármekter shyǵaratyn jańa tseh iske qosyldy. Jylyna 200 million tabletka shyǵarýǵa qaýqarly kásiporynnyń ónimi kepildendirilgen tegin meditsinalyq kómek aiasynda satyp alynatyn bolady, dep habarlaidy "Ult aqparat".
Búgin zaýyttyń 135 jyldyǵy men tsehtyń iske qosylýy saltanatty túrde atalyp ótti. Sharaǵa qatysqan oblys basshysy Janseiit Túimebaev zaýyt basshylary men qyzmetkerlerin búgingi qos qýanyshpen quttyqtady.
«1882 jyly qurylǵan «Himfarm» AQ respýblikamyzdaǵy eski farmatsevtikalyq kásiporyndardyń biri. Búgin atalǵan kásiporynǵa 135 jyl tolyp otyr. 2011 jyldyń tamyz aiynan kásiporynnyń seriktesi eýropalyq «Polpharmagroup» kompaniiasy bolyp keledi. Kásiporynnyń órkendep damýyna tilektestigimdi bildire otyryp, el ekonomikasynyń damýyna qosar úlesterińiz kóp bolsyn deimin», - dedi ákim.
Jańa tseh farmatsevtikalyq ónimderge qoiylatyn GMP talaptaryna sai salynǵan. Qatty dári shyǵaratyn óndiris tsehy zamanaýi qurylǵylarmen jabdyqtalǵan. Munda 72 adam jumyspen qamtylsa, olardyń basym bóligi Polpharma tobynyń úzdik óndiris oryndarynda oqyp kelgen. Óndiristiń quny 13,5 mln AQSh dollaryn quraidy.
Sondai-aq, QR Úkimeti men Ońtústik Qazaqstan oblysy ákimdiginiń qoldaýymen dári shyǵarýshy kompaniiasyna ónimderin satyp alý kepildigi berilip otyr.
«Búgin biz peroraldy qabyldaýǵa arnalǵan qatty dárilerdiń jańa óndirisin iske qostyq. Bul 2011 jyldan beri ashylǵan, halyqaralyq GMP sapa standartyna sai keletin úshinshi tseh. Bizdiń dári-dármek Qazaqstan men kórshi elderdegi ambýlatoriialar men statsionar emdeý mekemelerinde tiimdi qoldanylýda. Dári shyǵarýshy kompaniianyń turaqty jáne údemeli damýynyń taǵy bir jobasyn sátti aiaqtaǵanymyzdy maqtan tutamyz», - dedi kompaniianyń bas direktory Iji Ýrbanets.
Zaýyttyń óndiris qorjynynda terapiianyń túrli salalaryndaǵy aýrýlardy emdeýge arnalǵan 12 farmatsevtikalyq topqa jatatyn 200-den astam dári-dármek bar. Kompaniia óz ónimderiniń 90% ishki naryqqa jetkizse, 10%-yn bes elge eksporttaidy, olar - Resei, Qyrǵyzstan, Tájikstan, Monǵoliia jáne Túrikmenstan. Bolashaqta Ózbekstan Respýblikasymen de tyǵyz bailanys ornatpaq.
Dári shyǵarýshy kompaniia farmatsevtikalyq ónimderdiń jańa túrlerin jańǵyrtý jáne óndirý maqsatynda «Himfarm» AQ-ǵa 100 mln. AQSh dollarynan astam investitsiia quidy. Qazirgi ýaqytta kompaniia dári-dármekter óndirýshilerdiń arasynda jetekshi oryn alady jáne otandyq dári-dármekter naryǵynyń 40 paiyzyn, al elimizdegi jalpy dári-dármekter naryǵynyń 4 paiyzyn qamtidy.
Aita keteiik, 2016 jyly Polsha Respýblikasy men OQO arasyndaǵy taýar ainalym 13,3 mln AQSh dollaryn qurasa, jyl basynan beri taýar ainalymy 8,5 mln AQSh dollaryn qurady.
