Shymkentte qarly borannan elektr jelileri úzilip, 18 eldi meken jaryqsyz qaldy. Túnde sóngen jaryqty mamandar áli kúnge qosyp úlgermei jatyr, dep habarlaidy "Ult aqparat".
Shymkent qalalyq ákimdiginiń málimetinshe, elektr júiesiniń dispetcherlik jedel qyzmet kórsetý bólimi kúsheitilgen kestede jumys jasaýda. Tańnan beri 34 avariialyq jaǵdai tirkelip, saǵat 11:00-ge deiin onyń 11-i qaita iske qosylǵan. Qalǵan oqiǵa oryndarynda jumystar úzdiksiz júrip jatyr. Elektr jelilerin qosýǵa 22 brigada, 50 adam jumyldyrylǵan. Qaladaǵy birqatar kóshelerde baǵdarshamdar sónip, keptelister týyndaǵan. Jekemenshik úilerdegi peshter elektr jelisine qosylatyndyqtan kóbisi jylýsyz qalǵan.
Al, Abai aýdanynda qar tazalaý jumysy eki aýysymda júrgizilip jatyr. Kommýnaldy qyzmetter tańǵy saǵat 04:00-den bastap qarqyn alǵan. Aýdannyń joldaryn, jaiaý júrginshiler jolyn, alańdary men basqa da qoǵamdyq oryndardy qardan tazalaýǵa 27 arnaiy tehnika jáne 171 adam jumyldyryldy. Kommýnaldyq qyzmetshiler 258 aýlany 11 baǵyt boiynsha qardan tazalaý jumysyn jalǵastyrýda.
Eńbekshi aýdanynda qar jaýa bastaǵan sátten kóktaiǵaqtyń aldyn alý úshin joldar men qiylystarǵa muzdy eritetin materialdar sebilgen, jaiaý júrginshiler joly qardan tazalanýda. Bul jumystarǵa 8 kommýnaldyq mekemeden 76 tehnika men 250-den astam jumysshy tartyldy. Al aýdan ákimdigi tarapynan qar tazalaý jumystaryn táýlik boiy baqylaityn kezekshilik uiymdastyrylyp otyr.
