Búgin Shymkenttegi diagnostikalyq jáne reanimatsiialyq ota jasaý aýrýhanasy paidalanýǵa berildi, dep habarlaidy "Ult aqparat".
Qazaqstan Respýblikasynyń Tuńǵysh Prezidenti kúni merekesine orai, paidalanýǵa berilgen densaýlyq saqtaý nysanynyń ashylý rásimine oblys ákimi Janseiit Túimebaev qatysyp, barsha meditsina salasynyń qyzmetkerlerin quttyqtady.
Jańa nysan 2 jylda salynyp, iske qosylyp otyr. Densaýlyq saqtaý mekemesiniń birinshi qabatynda ákimshilik, qabyldaý jáne zerthanalyq-diagnostikalyq bólimderi ornalastyrylsa, ekinshi qabatynda palatalar men reanimatsiia bólimi bar. Al, úshinshi qabatta 7 bloktan turatyn ota jasaý bólimi men búirek pen baýyr almastyratyn gepatopankreatobilarlyq hirýrgiia bólimi ornalastyrylǵan. Emdelýshiler úshin de statsionarda qosymsha 45 tósek-oryn qarastyrylǵan.
Aita keteiik, Shymkent qalalyq jedel meditsinalyq kómek kórsetý aýrýhanasy qala jáne oblys halqyna táýlik boiy hirýrgiia, jaraqat, ýrologiialyq, neirohirýrgiialyq, ginekologiialyq, nevrologiialyq jáne terapiialyq salalar boiynsha emdik sharalaryn júrgizedi. Mekeme mandandyrylǵan jáne joǵary mamandandyrylǵan jedel jáne josparly meditsinalyq kómek kórsetetin kópsalaly statsionar bolyp tabylady. Munda kúndelikti 200-250 naýqas meditsinalyq kómekke júginedi. Orta eseppen olardyń 70-90 aýrýhanaǵa jatqyzylady. Emdeý mekemesi boiynsha jyl saiyn júieli túrde emdik is-sharalardyń innovatsiialyq, joǵary tehnologiialyq ádisteri óndiriske endirilýde.
Jalpy, osy jyly oblys boiynsha 38 densaýlyq saqtaý nysandarynyń qurylysyna oblystyq biýdjetten 3,8 mlrd teńge qaralyp, qurylystary júrgizilip otyr. Onyń 34 nysany jyl sońyna deiin tapsyrý josparlanǵan.
