Shymkent qalasy jumyspen qamtý jáne áleýmettik qorǵaý basqarmasynyń «Qandastardy beiimdeý jáne yqpaldastyrý ortalyǵy» kommýnaldyq memlekettik mekemesi 2008 jyldan beri qandastarǵa beiimdeý jáne yqpaldastyrý qyzmetin kórsetip keledi, dep habarlaidy QazAqparat.
Otandastar qory taratqan málimetke qaraǵanda ortalyqtaǵy 39 bólme 170 adamǵa arnalǵan.
Munda tarihi Otanyna oralǵan qandastarymyz 6 ai tegin turyp, tegin qyzmet túrlerin paidalana alady.
Qandastar úshin arnaiy ashana, demalatyn bólme jáne arnaiy oqý bólmesi bar.
Qandastarǵa 6 túrli kishi kásiptik mamandyq (aspazshy, konditer, esep jáne aýdit, elektrik, tiginshi, gazelektrodánekerleýshi) jáne qazaq tili, orys tili, QR Zańnamasy, QR tarihy, etno-pedagogika (ádet-ǵuryp), halyq pedagogikasyndaǵy otbasylyq tárbie syndy 6 pándik dárister qalaýlary boiynsha úzdiksiz oqytylady.
«Sonymen qatar elimizdegi mádeni, merekelik is-sharalardy uiymdastyryp, atajurtyna oralǵan qandasqa tarih qoinaýynda qalyp qoiǵan estelikterdi eske túsirýge at salysamyz. Qalamyzdaǵy «Shymkent - qaiyrymdy qala» baǵytynda jumys atqaratyn qaiyrymdylyq qorlarmen jumys jasap, áleýmettik mártebesi tómen otbasylarǵa qol ushyn sozyp, áleýetin arttyrý úshin jumys atqarylady», - deidi ortalyq mamandary.
Ortalyqqa 2008 jyldan qazirgi tańǵa deiin 781 otbasy, 2176 qandas kelip beiimdeý qyzmetterin paidalanyp, 1046 qandas kishi kásiptik mamandyq alyp shyqty.
Ortalyqta búginde 14 otbasy 35 qandas bar. Onyń 16-sy - balalar, 19-y - eresekter.
