Foto:elements.envato.com
Shymkentte kámeletke tolmaǵandardy jezókshelikke tartqan, adam saýdasymen ainalysqan qylmystyq top músheleri ustaldy. Bul týraly Ishki ister ministrligi málimdedi, - dep habarlaidy Tengrinews.kz.
"Tamyzda Shymkentte adam saýdasymen, kámeletke tolmaǵandardy jezókshelikpen ainalysýǵa tartýmen ainalysqan 11 adamnan turatyn uiymdasqan qylmystyq toptyń áreketiniń joly kesildi.
Olardyń 23 qylmystyq iske qatystylyǵy dáleldenip, 18 jábirlenýshiniń, altaýy kámeletke tolmaǵandar ekeni anyqtaldy. Kúni keshe ǵana adam saýdasymen ainalysqan taǵy bir uiymdasqan qylmystyq top áshkerelendi", - deidi IIM Uiymdasqan qylmysqa qarsy kúres departamentiniń basshysy Qanat Nurmaǵambetov.
Adam saýdasyna qarsy forýmda ol jyl saiyn adam saýdasyna qatysty 100-den asa qylmys sotaldy tergeýge tirkeletinin túsindirdi. 2019 jyly - 182, 2020 jyly - 111, 2021 jyly - 103, biyl 9 aida - 79 tirkelgen.
"Adam saýdasymen ainalysatyn uiymdasqan toptardyń, onyń ishinde transulttyq toptardyń zańsyz áreketteriniń joly kesilip jatyr. 2019 jyly quqyq qorǵaý organdary eki uiymdasqan qylmystyq toptyń qyzmetin toqtatty, 2020 jyly - 1, 2021 jyly - 2, 2022 jyly - 6.
Bizdiń azamattardy Bahrein Koroldigine, Ońtústik Koreiaǵa jáne basqa elderge qanaý maqsatynda áketetin arnalar joiylyp jatyr", - dedi Nurmaǵambetov.
