Shymkentte 45 jastaǵy áiel 12 qabattan sekirip, mert boldy. Qaiǵyly jaǵdai qala ortalyǵyndaǵy kópqabatty úilerdiń birinde oryn alǵan, dep habarlaidy "Ult aqparat".
Kýágerlerdiń aitýynsha, áiel Iliaev kóshesindegi 37-úidiń 12-qabatynda biraz ýaqyt otyrǵan. Keiinnen saǵat 12.10-dar shamasynda sekirip ketken. Araǵa jeti minýt salyp, oqiǵa ornyna jedel járdem kóligi jetken. Politseiler shaqyrtyldy.
Kópqabatty úi turǵyndarynyń sózinshe, marqum bul úide turmaǵan. Iaǵni, tanymaityn bolyp shyqty. Qazir oqiǵa ornynda politseiler kýágerlerden jaýap alyp, tergeý sharalaryn júrgizýde.
12-qabattan qulaǵan áieldiń jasy 45-te bolyp shyqty. Onyń sońynda qalǵan zattardyń ishinen beimálim suiyqtyq quiylǵan kanistr tabyldy.
Áieldiń ólimine qatysty qylmystyq is qozǵaldy. Túrkistan oblystyq IID baspasóz qyzmetiniń málimetinshe, atalǵan jait Sotqa deiingi tergeýdiń biryńǵai tizilimine QR QK -niń «ózin-ózi óltirýge deiin jetkizý» babymen tirkelgen
«Qazirgi tańda bolǵan oqiǵanyń mán-jaiy anyqtaýda. Sotqa deiingi tergep - tekserý amaldary júrgizilýde. Sot-meditsinalyq saraptamalar taǵaiyndaldy»,- delingen habarlamada.
