Shymkentte mereke kúnderi dúniege kelgen 238 sábidiń analaryna «Súiinshi» atty estelik bebi boks tabys etildi, dep habarlaidy QazAqparat.
«Súiinshi» syi qorabyna bóbekke qajetti zattardan basqa QR Prezidenti Qasym-Jomart Toqaevtyń quttyqtaý tilegi jazylǵan ashyq hat, «Táýelsiz Qazaqstanǵa 30 jyl» monetasy men balanyń týýy týraly kýáligi salynǵan. 28 jasynda kóp balaly ana atanǵan Aqbota Bekjanova da «Súiinshi» syilyǵyna ie boldy. «Ulym dúniege kelgen soń Prezidentten alǵys alýyn jaqsylyqqa balap otyrmyz. Erekshe qurmet kórsetken Memleket basshysyna alǵys aityp, rizashylyǵymdy bildirgim keledi. Elimiz aman, Táýelsizdigimiz máńgilik bolsyn!» - dedi ol.
Táýelsizdik merekesiniń qarsańynda tórtinshi perzentin dúniege ákelgen jas ana ulynyń esimin Aidyn dep qoiǵan. Qazir sábidiń jaǵdaiy jaqsy. Dárigerlerde jii-jii habarlasyp turady.
«Bizdiń qyzmetkerler 16 jáne 17 jeltoqsanda jumys istedi jáne AHAJ ókilderimen birlesip árbir sábi ómirinde óziniń alǵashqy qujatyn alýy úshin perzenthanalarda qujattardy qabyldady. Osy kezeńde Shymkent qalasynda barlyǵy 238 sábi dúniege keldi, onyń ishinde 3 egiz bar», - dedi «Azamattarǵa arnalǵan úkimet» memlekettik korporatsiiasy Shymkent qalasy boiynsha filial direktory Danabek Isabekov.
«Súiinshi» syi qoraptaryn taratýdy QR Tsifrlyq damý, innovatsiialar jáne aeroǵarysh ministrligi «Azamattarǵa arnalǵan úkimetpen» birge jáne QR Ulttyq banki, Tsentrkredit banki jáne «Qazposhta» AQ qatysýymen uiymdastyrdy. Sondai-aq, ata-analardyń qalaýy boiynsha perzenthanaǵa nemese úiine jetkizildi.
