Belgili qoǵam belsendisi Dina Tańsári Shymkentte 11-synyp oqýshysy ákesi 7-synyptan beri zorlap kele jatqanyn málimdegenin aitty, - dep habarlaidy Massaget.kz portaly.
Tańsáriniń sózinshe, 16 jastaǵy qyz bul oqiǵa týraly TikTok-ta aitqan. Ol eki ret sýitsid jasamaq bolǵan. Biraq bul jait týraly tis jarýǵa qoryqqan. Kópbalaly otbasynan shyqqan.
Shymkent qalalyq Politsiia departamentiniń resmi ókili Saltanat Qarakózova bul jaitqa qatysty pikir bildirdi.
"Bul derek Shymkent qalasy Qarataý aýdandyq politsiia bóliminiń sotaldy tergep-tekserýlerdiń biryńǵai tizilimine Qylmystyq kodekstiń 122-baby boiynsha tirkeldi. Sotaldy tergeý boiynsha qajet tergeý amaldary júrip jatyr, onyń ishinde, saraptamalar da taǵaiyndaldy. Jasóspirimmen psihologtar jumys istep jatyr. Alaida kámeletke tolmaǵan qyz ben ata-anasy politsiiaǵa aryz jazýdan bas tartty jáne zorlyq deregin joqqa shyǵaryp otyr", - deidi Saltanat Qarakózova.
Onyń sózinshe, is Shymkent qalasy Politsiia departamenti basshylyǵynyń baqylaýynda.
