Foto: ashyq derekkóz
Shymkent qalasynyń prokýratýrasy júrgizgen tekserý barysynda jeke sot oryndaýshylary tarapynan birqatar zańbuzýshylyq anyqtaldy, dep habarlaidy Ult.kz.
Atap aitqanda, boryshkerlerdiń Qazaqstan Respýblikasynan shyǵýyna buryn qoiylǵan shekteýlerdiń zańsyz alynyp tastalǵany jáne atqarýshylyq is júrgizýdiń negizsiz qozǵalǵany belgili boldy. Keibir jaǵdailarda jeke sot oryndaýshylary eńbek demalysynda júrgen kezde olardyń kómekshileri atqarýshylyq is júrgizýdi zańsyz bastaǵan.
Anyqtalǵan zańbuzýshylyqtardy joiý maqsatynda Shymkent qalasynyń prokýratýrasy Qazaqstan Respýblikasynyń Ádilet ministriniń atyna tiisti usynys engizdi. Usynysty qaraý nátijesinde 85 jeke sot oryndaýshysy tártiptik jaýapkershilikke tartylyp, olardyń bir bóligin litsenziiasynan aiyrý týraly sotqa talap aryz berildi.
Sot sheshimimen Qazaqstan Respýblikasy Ádilet ministrliginiń talap qoiýy qanaǵattandyrylyp, 12 jeke sot oryndaýshysy qyzmetin júzege asyrý quqyǵynan aiyryldy. Atalǵan sot aktileri zańdy kúshine endi.
Prokýratýra organdary atqarýshylyq is júrgizý salasyndaǵy zańdylyqtyń saqtalýyn turaqty túrde baqylaýda ustaitynyn jáne zańbuzýshylyqtar anyqtalǵan jaǵdaida kináli tulǵalardy jaýapkershilikke tartý boiynsha tiisti sharalar qabyldaitynyn málimdedi.
