Qazaqstan Respýblikasy Prezidenti Ákimshiligi men qalalyq máslihattyń kelisimi boiynsha Ońtústik Qazaqstan oblysy ákiminiń ókimimen Shymkent qalasynyń ákimi bolyp Nurlan Saýranbaev taǵaiyndaldy, - dep habarlaidy "Ult aqparat".
Búgin oblys ákimi J.Túimebaev Shymkent qalasynyń ákimi laýazymyna taǵaiyndalǵan Nurlan Ermekuly Saýranbaevty qala aktivine tanystyryp, aldaǵy jumysyna sáttilik tiledi. Shymkent qalasy Elbasynyń nazaryndaǵy ekonomikasy men qurylysy qarqyn alǵan elimizdegi úshinshi qala ekenin aitqan aimaq basshysy qala ákimine jańa jumysynda júktelgen mindetterdi abyroimen atqaratynyna senim bildirip, birqatar tapsyrmalar júktedi.
«Siz - kásibi deńgeii joǵary, memlekettik qyzmettiń túrli salasynan ótken tájiribeli mamansyz, sondyqtan da Nurlan Ermekuly qalanyń áleýmettik-ekonomikalyq damýyna keri áser etip otyrǵan birqatar máselelerge nazar aýdaryp, memlekettik baǵdarlamalardyń oryndalýyn qamtamasyz etýdi, qala biýdjetiniń kiris bóligin arttyrýdy. Sondai-aq, shaǵyn jáne orta biznesti damytý maqsatynda investorlar tartýdy, jańa óndiris oryndaryn ashý arqyly turǵyndardy jumyspen qamtýdy, qalaǵa jańadan qosylǵan eldi mekenderdiń infrasrtýktýrasyn damytý boiynsha naqty sharalar qabyldaýdy tapsyramyn», - dedi oblys ákimi.
Nurlan Ermekuly Saýranbaev 1967 jyly 20 mamyrda Jambyl oblysynda dúniege kelgen. 1991 jyly ál-Farabi atyndaǵy qazaq memlekettik ýniversitetin, 2001 jyly - ENI-Adjip munai ónerkásibiniń oqý ortalyǵyn bitirgen. Munaidy basqarý magistri.
Eńbek jolyn 1991 jyly Almaty qalasynda «Eńbek» JShS-nyń direktory laýazymynan bastady, 1997 jylǵa deiin direktor laýazymyn atqardy. 1997 - 1998 jyldary – Qazaqstan Respýblikasynyń Kásipkerler kongresiniń atqarýshy direktory. 1998 - 2000 jyldary – «Qazaqstan Temir Joly» RMK «Jolaýshylar tasymaly» EMK direktory. 2000 - 2001 jyldary - «AMÓZ» AAQ birinshi vitse-prezidenti. 2001 - 2002 jyldary - «Qazaqoil» NNK JAQ «AMÓZ» AAQ qaita qurý jobasyn basqarý jónindegi toptyń basshysy, bas menedjer. 2002 - 2004 jyldary - «QazMunaigaz» UK JAQ injiniringilik jáne servistik jobalar departamentiniń direktory. 2004 - 2007 jyldary - «TeńizServis» JShS-nyń vitse bas direktory. 2007 - 2010 jyldary - «QazMunaiGaz» UK AQ-nyń basqarýshy direktory. 2010 - 2011 jyldary - «Samuryq-Qazyna» UÁQ AQ-nyń Basqarma bastyǵy orynbasarynyń kómekshisi. 2011 jylǵy qańtar-mamyr ailarynda - «Samuryq-Qazyna» UÁQ AQ-nyń basqarýshy direktory. 2011-2014 jyldary – QR Indýstriia jáne jańa tehnologiialar vitse-ministri. 2014 jyldyń tamyz aiynan QR qorǵanys ministriniń orynbasary boldy. 2015 jyldyń qańtar aiynda «Qazaqstan injiniring» UK» AQ direktorlar keńesiniń tóraǵasy bolyp sailandy.
