Shymkentte Túrkistan oblystyq júike aýrýlary dispanseriniń alty meditsina qyzmetkerine koronavirýs juqqan. Qalada virýs juqqan meditsina qyzmetkerleriniń sany on adam boldy. Bul týraly 17 sáýir kúni qalalyq densaýlyq saqtaý basqarmasy málimdedi, dep habarlaidy Azattyq.
Basqarma málimetinshe, qalalyq juqpaly aýrýlar aýrýhanasy jan saqtaý bóliminiń – 3 qyzmetkerinen, Túrkistan oblystyq júike aýrýlary dispanseriniń - 6 qyzmetkerinen, Túrkistan oblystyq «Ulttyq saraptama ortalyǵyna» qarasty virýsologiialyq zerthananyń 1 qyzmetkerinen koronavirýs anyqtalǵan. Zerthanashymen qarym-qatynasta bolǵan onyń 5 otbasy múshesine de virýs juqqan. Naýqastardyń barlyǵy oqshaýlanyp, qalalyq juqpaly aýrýlar aýrýhanasynda em qabyldap jatyr.
Qalalyq politsiia departamentiniń dereginshe, oblystyq júike aýrýlary dispanseri – qaladaǵy karantinge jabylǵan 10 aýrý oshaǵynyń biri. Kúndiz-túni politsiia kúzetetin dispanserge bóten adamdardyń kirip-shyǵýyna tyiym salynǵan.
«Oblystyq júike aýrýlary dispanserinde 76 adam karantinde jatyr. Olardyń 36-sy – meditsina qyzmetkeri, bireýi – kúzetshi, 39-y – em qabyldap jatqan naýqas» delingen basqarma habarlamasynda.
Shamamen bir apta buryn Shymkent qalasynyń aýmaǵynda ornalasqan Túrkistan oblystyq júike aýrýlary dispanseriniń nevrologiia bóliminiń úsh meditsina qyzmetkerinen koronavirýs tabylyp, bólim karantinge jabylǵan edi.
17 sáýirde bas sanitar dáriger Aijan Esmaǵambetova Qazaqstanda barlyǵy 423 meditsina qyzmetkerine koronavirýs juqqanyn, Almaty, Nur-Sultanmen qatar Shymkent qalasynda da dárigerlerden koronavirýs tabylǵanyn habarlaǵan. Biraq ol naqty sanyn aitpady.
Sońǵy málimet boiynsha, Shymkentte koronavirýs juqtyrǵandar sany 46 adamǵa jetken. 3 adam qaitys bolyp, 2 adam jazylǵan. Qala 4 sáýirden beri karantinge jabylǵan.
