Shymkent turǵynyna oq atqan jigit qolǵa tústi, – dep habarlaidy Polisia.kz.
25 qyrkúiek tańǵy saǵat 7:00-de Eńbekshi APB-nyń “102” arnasyna Túrkistan oblysyndaǵy aýrýhanalardyń birine 23 jastaǵy er azamattyń atys qarýynan jaraqat alyp jetkizilgeni týraly habarlama kelip túsken.
"Atalǵan jait QR QK-niń 293-baby 3-bóligimen (Buzaqylyq) sotqa deiingi tergep-tekserýdiń biryńǵai tizilimi boiynsha tirkeýge alyndy.
Politsiia qyzmetkerleri habarlamany alǵan boida kúdiktiniń jeke basyn anyqtaýǵa baǵyttalǵan qajetti sharalardy qabyldap, jedel-izdestirý jumystaryna kiristi. Nátijesinde Shymkent qalasynyń 23 jastaǵy turǵyny anyqtalyp, qala aýmaǵynda qolǵa tústi" - delingen habarlamada.
Tergeý barysynda belgili bolǵandai, qyrkúiektiń 24-nen 25-ne qaraǵan túni kúdikti qaladaǵy kópqabatty úilerdiń biriniń aldynda ekeýara eregistiń sońynda qarýdan jábirlenýshige oq atqan. Saldarynan ol asqazan aýmaǵynan jaraqat alyp, aýrýhanaǵa túsken.
"Jaýap alý kezinde kúdikti qarýdy qaida jasyrǵandyǵyn kórsetip, atalǵan mekenjaidan aiǵaqty zat retinde Makarov tapanshasy men 3 oq tárkilenip alyndy. Zattai dáleldemelerge tiisti saraptamalar taǵaiyndaldy.
Ustalǵan azamattyń osyǵan deiin de QR QK-niń 293-baby (Buzaqylyq) jáne 287-baby (Qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý) boiynsha eki ret sotty bolǵandyǵy anyqtaldy. Qazirgi kezde kúdikti ýaqytsha ustaý izoliatorynda qamaýda" - delingen politsiia málimetinde.
