Túrkistan oblysynda kámeletke tolmaǵan qyzdy klientke satyp jatqan jerinen Shymkent turǵyny ustaldy, dep habarlaidy "Ult aqparat" polisia.kz saityna silteme jasap.
Áiel adam qyz balany 1 million teńgege baǵalaǵan. Anyqtalǵandai, jeńgetai ony intimdik qyzmet úshin buǵan deiin birneshe ret jalǵa bergen.
«13 sáýir kúni Túrkistan oblystyq Politsiia departamentiniń kriminaldyq politsiia basqarmasyna áiel adam kámeletke tolmaǵan qyzdy jynystyq qyzmet kórsetý úshin belgili somaǵa satatyny týraly habarlama tústi. Atalǵan jait QR Qylmystyq kodeksiniń 309-babynyń 2-bóligi (jezókshelikpen ainalysýǵa arnalǵan pritondar uiymdastyrý nemese ustaý jáne jeńgetailyq) boiynsha sotqa deiingi tergep-tekserýdiń biryńǵai tizilimine tirkeldi. Sol kúni jedel-izdestirý is-sharasy barysynda, Túrkistan oblysy PD KPB jáne Sairam aýdandyq politsiia bóliminiń qyzmetkerleri Sairam aýdany Aqsýkent aýylyndaǵy qonaqúilerdiń birinen kámeletke tolmaǵan qyzdy satý kezinde Shymkent qalasynyń turǵynyn ustady», - delingen málimette.
Kámelet jasyna tolmaǵan qyz bala da Shymkent qalasynyń turǵyny, oqý oryndarynyń biriniń stýdenti.
«Politsiia qyzmetkerleri kúdikti áielden aiǵaqzat retinde million teńge aqshany tárkilep aldy. Tergeý barysynda kúdikti osy qyzdy jynystyq qyzmet kórsetý úshin buǵan deiin birneshe ret usynǵany anyqtady. Jeńgetai kelissózderdi telefon arqyly júrgizip, klientterge messendjermen kámeletke tolmaǵan qyzdyń sýretin kórsetip otyrǵan. Ony pák, taza dep syltaýratyp, klientterden iri kólemde aqsha surap, kelisýden keiin kezdesýdi uiymdastyryp otyrǵany belgili boldy», - dedi politsiiadan.
Atalǵan fakti boiynsha sotqa deiingi tergeý amaldary júrgizilip jatyr. Kúdikti qamaýǵa alyndy. Túrkistan oblysynyń politseileri istiń tolyq mán-jaiyn jáne áieldiń basqa da osyǵan uqsas qylmystarǵa qatysy bar-joǵyn anyqtaýda.
