«Shymkent – TMD elderiniń mádeni astanasy 2020» jylynyń saltanatty jabylý rásimi onlain formatta «Tsitadel» tarihi-mádeni kesheninde ótti. Is-shara Ońtústik TV jáne YouTube-ta Bridge TV arnalarynda kórsetildi, dep habarlaidy "Ult aqparat".
Shymkent qalasynyń ákimi Murat Áitenov merekeli jyldy qorytyndylap, TMD mádeni astanasy estafetasyn Dýshanbe qalasynyń tóraǵasy Rýstami Emomaliǵa tabystady.
«Shymkent – 2200 jyldyq tarihy bar kóne shahar. Osynaý tarihi qalamyzdyń TMD elderiniń mádeni astanasy atanýy biz úshin úlken mártebe. Sonymen birge, UNESCO biyl qalamyzdyń tarihy keminde 2 200 jyldan syr shertetinin resmi málimdedi. Osyndai tarihi sáttiń qarsańynda Elbasy million turǵyny bar, shýaqty Shymkent qalasyna respýblikalyq mańyzy bar qala mártebesin berdi. Memleket basshysy Q.Toqaev Shymkent qalasynyń áleýmettik-ekonomikalyq damýyna airyqsha mán berip otyr.
Qalamyz ǵasyrlar boiy búkil Aziianyń óneri men mádeni murasy toǵysqan iri ortalyqqa ainaldy.
Sol zamandardan beri Shymkent turǵyndarynyń boiynda erekshe qasiet qalyptasty. Bul – iskerlik, qonaqjailylyq jáne ózgeriske degen beiimdilik.Dostyq estafetasyn Uly Jibek jolymen Dýshanbege joldaimyz», – dedi qala ákimi quttyqtaý sózinde.
Sondai-aq, onlain jiynda TMD Atqarýshy komitetiniń tóraǵasy – Atqarýshy hatshy Lebedev S.N., Memleketaralyq gýmanitarlyq yntymaqtastyq qory basqarma tóraǵasy, Ázerbaijan Respýblikasynyń Resei Federatsiiasyndaǵy Tótenshe jáne Ókiletti elshisi Polad Biýlbiýlogly qala turǵyndary men qonaqtaryna arnaiy merekelik quttyqtaý tilegin jetkizdi.
Dostyq estafetasy Tájikstan Respýblikasynyń Almaty qalasyndaǵy Bas konsýly Bahodýr Nazir myrzaǵa tabystaldy. 2 200 kitap, 2 200 tumar jáne 2 200 qyzǵaldaq túinegimen toltyrylǵan kerýen (Shymkent qalasynyń 2200 jyldyǵyna orai) Jibek jolymen Tájikstan Respýblikasynyń Dýshanbe qalasyna attanady
Mádeni astana jylynyń jabylýy aiasynda 6 teatr, 5 kitaphana, tsirk, zoobaq, ádet ǵuryp jáne salt dástúr ortalyǵy, Mádeniet úii jáne basqa da mádeniet mekemeleriniń shyǵarmashylyq ujymdarynyń kúshimen 48 spektakl, 99 onlain-is-shara, 7 jyljymaly teatr perfomansy, 5 mýzykalyq perfomans, aqyn-jazýshylar, ádebi qairatkerler beinesindegi qýyrshaqtar sherýi uiymdastyryldy. Shymkent qalasynyń jas sýretshileriniń kórmesi men ǵimarattardyń qasbetterinde 7 mýraldyń ashyldy.
