Shymkent qalalyq PD baspasóz hatshysy Móldir Bekeeva jumysyna oraldy, - dep habarlaidy Massaget.kz portaly Elitar.kz saityna silteme jasap.
Basylym málimetinshe, ol óz laýazymyna - PD resmi ókili, ishki jáne syrtqy kommýnikatsiialar basqarmasynyń basshysy qyzmetine kelgen. Bul týraly ózi aitqan.
"Shynynda da, men kesheden beri jumystamyn. Óz laýazymymda", - degen ol.
Sonymen qatar, ol dárigerler jumysqa shyǵýyna qarsy ekenin jetkizgen. Móldirdiń aitýynsha, qazir Departamentte respýblikalyq komissiia jumys istep jatyr. Komissiia onyń isin tergeidi.
Eske salaiyq, Shymkent qalalyq PD baspasóz hatshysy Móldir Bekeeva ózine qol jumsamaq bolǵan edi. 5 sáýirde Móldir Bekeeva Facebook-paraqshasynda qoshtasý jazbasyn qaldyrǵan. Ol jazbada mundai qadamǵa barýyna qalalyq PD basshylyǵynyń qysymy itermelegenin aitqan. Onyń aitýynsha, oǵan Shymkent qalalyq PD-nyń jańa basshysy Qairat Dálbekov jýrnalisterdi "tamaqtandyrýdy" usynǵan kórinedi. Bekeevanyń aitýynsha, budan bas tartqannan keiin onyń ústinen qylmystyq is qozǵalǵan. Ol bulai ómir súre almaitynyn aityp, otbasymen, dostarymen jáne áriptesterimen qoshtasqan.
