Foto: © Polisia.kz
Shymkent politseileri eki jyl buryn bolǵan adam óltirý qylmysynyń betin ashty, – dep habarlaidy Polisia.kz.
2021 jyly jergilikti turǵyn Eńbekshi aýdanynyń politsiia basqarmasyna 32 jastaǵy ulynyń joǵalyp ketkenin habarlaǵan. Anasy er adamnyń eki apta buryn úiden shyǵyp, qaityp oralmaǵanyn aitqan.
"Habar-osharsyz ketken azamattyń júrgen jerin anyqtaý maqsatynda kriminaldyq politsiia qyzmetkerleri keshendi sharalar júrgizdi. Tártip saqshylary onyń otbasy músheleri, kórshileri jáne dostarynyń arasynda saýalnama júrgizip, jaqyn mańdaǵy beinebaqylaý kameralarynyń jazbalaryn tekserdi.
Sondai-aq er adamnyń syrtqy kelbetin sipattaityn baǵdarlar qalalyq politsiia departamentiniń basqarmalaryna, sondai-aq elimizdiń barlyq aimaqtaryndaǵy politsiia bólimderine joldandy.
2 jyl boiy izdestirý jumystary nátijesiz bolǵanymen, biyl, jyl basynda jedel qyzmetkerler osy derek boiynsha ilmek taba aldy. Kezdeisoq kýágerdiń jaýabyna sáikes, azamattyń joǵalyp ketýine inisiniń qatysy bar ekendigi anyqtaldy", - delingen habarlamada.
Qabyldanǵan sharalar nátijesinde, ol ógei baýyryn otbasylyq janjal barysynda basynan armatýramen birneshe ret uryp óltirgeni belgili boldy. Bul iske ógei aǵasynyń mas kúiinde anasymen janjaldasatyny itermelegen. Asa aýyr qylmystyń izin jasyrý úshin qaskúnem máiitti syrttaǵy dárethanaǵa tastap, shuńqyrdy betonmen toltyryp, ústine shaǵyn sarai turǵyzǵan.
Kúdikti qamaýǵa alyndy.
Eńbekshi APB-nyń tergeýshileri qylmystyq isti aiyptaý aktisimen sotqa joldady.
