Er adam Ońtústik Qazaqstan oblysyndaǵy meshitterdiń birinde turyp ózine qol salmaq boldy, dep habarlaidy Baq.kz aqparat agenttigi tvk-uko.kz saityna silteme jasap.
Sairamdaǵy molda Tursynqoja Hanhodjaevtyń aitýynsha, oqys oqiǵa ortalyq meshitte 26 qańtar kúni shamamen saǵat 16.20-da bolǵan. Dini qyzmetker álgi er adamdy qoly men moiny kesilgen kúide tabady. Keiin molda ony úiine jibermek bolady. Biraq er adam gaz shlangisin kesip jiberip, ózin órteidi. Osy sátte molda otty sóndirip, politsiia, órt sóndirýshiler qyzmetin jáne jedel járdemdi shaqyrady.
«Onyń qoly men kúrtesi órtendi, júziniń saý-tamtyǵy qalmady. Sasqalaqtap otty óshire bastadym, daýystap adamdardy da kómekke shaqyrdym. Keiin jedel járdemge habarlastym. Olar kelgenshe álgi er adamnan ne sebepti bulai jasaǵanyn suradym. Ol óz kezeginde muny ózine nazar aýdartý úshin jasaǵanyn moiyndady. Meshitke burynnan beri kelip júr. Ózi ishimdikke salynǵan, otbasynda da qiyndyqtar bar», - deidi molda.
Jedel járdem ózine qol salmaq bolǵan er adamdy Shymkenttiń qalalyq aýrýhanasyna aparyp jatqyzdy. Keiin kúiikti emdeitin ortalyqqa aýystyrdy.
