Shymkent mektepteriniń birinde ýytty gaz ballony shashylǵan, dep habarlaidy QazAqparat.
Sabaq arasyndaǵy qysqa úzilisterdiń kezinde mektep oqýshylarynyń biri burysh qosylǵan gaz ballonyn shashyratqan. Sonyń saldarynan 7 oqýshy men mekteptiń 1 qyzmetkeri zardap shekkeni belgili boldy.
«Mundai jaǵdai mektep qabyrǵasynda alǵash ret oryn alyp otyr. Búgin shamamen saǵat 09.50-de 9-synyp oqýshysy úzilis kezinde ákesi ózin-ózi qorǵaý úshin satyp ápergen burysh qosylǵan gaz ballonyn qoldanyp kórýge tyrysqan. Ol tek shashyp kórmek bolǵan. Túsindirý jumysy júrgizildi», - dedi bilim ordasy direktorynyń orynbasary Nurmahanbet Ábdirazaqov.
Oqiǵa ornyna birden jedel járdem qyzmeti jetip, balalarǵa alǵashqy kómek kórsetken.
Shymkent qalalyq Densaýlyq saqtaý basqarmasynyń basshysy Baqytjan Pozylovtyń aitýynsha, №55 mektepte belgisiz adamnyń ýytty gaz ballonyn shashqany týraly aqparat túsken. Biraq, balalardyń densaýlyǵyna aitarlyqtai qaýip joq. Olar buryshtyń ótkir jaǵymsyz iisin sezingen.
«Shuǵyl túrde jedel járdem qyzmetiniń 3 brigadasyn jiberdik. Olar oqiǵa ornyna 7-8 minýttyń ishinde jetti. 7 oqýshy men mekteptiń bir qyzmetkerin tekserdi. Barlyǵyna da alǵashqy meditsinalyq kómek kórsetildi. 3 oqýshyny qalalyq Giberbariialyq ottektený ortalyǵyna jetkizdik. Olarǵa da alǵashqy kómek kórsetilip, úilerine apardyq. Qazirgi ýaqytta barlyǵynyń jaǵdai jaqsy. Úsh kún boiy olardy baqylaýda ustaimyz», - dedi Baqytjan Pozylov.
