Ońtústik Qazaqstan oblysynyń ákimi Janseiit Túimebaevtyń tóraǵalyǵymen Shymkent qalasyn aýmaqtyq damytýdyń óńiraralyq jobasyn ázirleý máselesi boiynsha keńeitilgen májilis ótti. Jiynǵa Báidibek, Qazyǵurt, Ordabasy, Saryaǵash, Sairam, Túlkibas jáne Tólebi aýdandary men Shymkent, Arys qalalarynyń basshylary, sáýlet jáne qala qurylysy, oblystyq basqarma basshylary qatysty, dep habarlaidy "Ult aqparat" aimaq basshysynyń baspasóz qyzmetine silteme jasap.
Jiynda sóz alǵan Respýblikalyq memlekettik qala qurylysyn josparlaý jáne kadastr ortalyǵynyń bas direktory Turlybek Musabaev Shymkent aglomeratsiiasyn aýmaqtyq damytýdyń óńiraralyq shemasy ázirlengenin jetkizdi.
«Ázirlengen jobaǵa sáikes Shymkent aglomeratsiiasynyń aýmaǵy 1573,5 myń gektardy quraidy. Shymkent aglomeratsiiasynyń aýmaǵynda 1,8 mln. turǵyny bar 367 eldi meken ornalasqan. Budan bólek, 5 myńnan astam turǵyny bar 35 eldi mekenniń bas jospary jasaqtalyp otyr», - dedi Turlybek Túrikpenuly.
Jańa jobaǵa sáikes, 2020 jylǵa qarai Shymkent aglomeratsiiasyna jatatyn aýmaqta halyq sany 185 myńnan astam adamǵa nemese 10,3 paiyzǵa artyp, 1 986 087 adamdy quraidy degen boljam jasalyp otyr. Al 2030 jylǵa qarai qaladaǵy halyq sany 534 779-ǵa kóbeiip, 2 mln 335 myń 773 adamdy quraidy dep boljanýda.
Ázirlengen jobaǵa qanyqqan óńir basshysy tiisti sala basshylaryna ózgerister men usynystardy egjei-tegjeili taǵy da pysyqtap shyǵýǵa tapsyrma berdi.
«Shymkent qalasynyń aglomeratsiiasy osyǵan deiin birneshe ret keń kólemde talqylanǵan bolatyn. Osy maqsatta oblysymyzdaǵy tiisti basqarmalar tyńǵylyqty jumys júrgizip, ózgerister men usynystardy engizip shyqty. Endi bul jobamyzdy aldaǵy jeltoqsan aiynda Úkimettiń otyrysyna bekitýge usynatyn bolamyz. Sondyqtan áttegen-ai deitindei máseleler bolmaýy tiis» , - dedi Janseiit Túimebaev.
Aita keteiik, Shymkent qalasyn aýmaqtyq damytýdyń óńiraralyq jobasyn QR Investitsiialar jáne damý ministrligine qarasty Qurylys jáne turǵyn úi-kommýnaldyq sharýashylyq komiteti ázirlegen bolatyn. Atalǵan jobaǵa sáikes kontrmagnitter retinde aýdandardyń da ákimshilik ortalyqtary anyqtalǵan. Ońtústik baǵytynda - Saryaǵash qalasy, batys baǵytynda - Arys qalasy, shyǵys baǵytynda - Turar Rysqulov selosy bolyp belgilengen.
