Shymkenttegi aýrýhanalardyń birinde tóbeles boldy, - dep habarlaidy "Ult aqparat".
Keleńsiz jaǵdaidyń videosy áleýmettik jelide tarady. Beinejazbadan naýqastyń aldymen ádepsiz sózder aitqanyn, sodan keiin kúsh kórsetýge kóshkenin baiqaýǵa bolady.
"Oqiǵa 20 qyrkúiek saǵat 19:50-de giperbariialyq oksigenatsiia ortalyǵynda bolǵan. 1995 jyly týǵan azamat jedel járdem kóligimen aýrýhanaǵa jetkizilgen. Jaqyndarynyń aitýynsha, patsient ýly suiyqtyq ishken.
Dárigerler naýqasty tekserip, psihikalyq qozý jaǵdaiyna bailanysty tynyshtandyrý sharalaryn júrgizý úshin jansaqtaý bólimine kirgizgen. Alaida naýqas kómekke qarsylyq tanytyp, meditsina qyzmetkerlerine qatysty kúsh qoldanǵan.
Oryn alǵan jaǵdaiǵa bailanysty 102-qyzmetine habar berildi", - deidi vedomstvo ókilderi.
Abyroi bolǵanda aq halattylar aýyr jaraqat almaǵan.
Al Shymkent Politsiia departamenti quqyq buzýshynyń ustalǵanyn habarlady.
"20 qyrkúiek keshke Shymkent qalasy PD Ál-Farabi APB-nyń 102 pýltine meditsinalyq mekemelerdiń birinen shaqyrtý kelip tústi.
Oqiǵa ornyna barǵan politseiler mekemege jedel járdemmen jetkizilgen naýqas alǵashqy meditsinalyq kómek kórsetý kezinde medqyzmetkerlerge shabýyl jasaǵanyn anyqtady.
Quqyq buzýshy ustaldy. Saraptama taǵaiyndaldy, onyń qorytyndysy boiynsha QR-nyń zańnamasy aiasynda tiisti shara qabyldanady" - delingen habarlamada.
