Shymkent ákimi Ǵabidolla Ábdirahymov ákimdikte saǵattap ótetin jinalysty barynsha qysqartyp, tapsyrmalar men máseleler tek telefon arqyly berilý qajettigin tapsyrdy, dep habarlady Sputnik Qazaqstan tilshisi.
Shymkentte Elbasynyń halyqqa arnaǵan Joldaýy jańa formatta túsindirildi. Ákimdikte ótken jiynda birqatar basqarma basshylaryna naqty tapsyrmalar berildi. Birneshe basqarma basshysynyń esebin tyńdaǵan shahar ákimi tolyqtai tsifrlandyrý júiesine kóshý kerektigin, bul óz kezeginde sybailas jemqorlyqtyń aldyn alýdyń tóte joly ekenin túsindirdi.
"Sybailas jemqorlyqty joiý, biýrokratiiany azaitý, halyq pen memlekettik qyzmetkerler arasyndaǵy túsinispeýshilikti joiý meniń oiymsha tek qana tsifrlandyrý arqyly múmkin" degen Ǵabidolla Ábdirahymov bul júiege kóshý úshin ákimdik qarjy aiamaitynyn atap ótti. Endi qalanyń árbir turǵynynda ID karta bolmaq. Ol arqyly kez kelgen memlekettik qyzmetti úide otyryp-aq alýyna múmkindik týmaq. Tipti halyqtyń qoǵamdyq kólikte júrý, avtoturaq syndy qyzmetterdi qala qonaqtaryna qaraǵanda tómendetilgen baǵamen alýyna septigin tigizbek. Ákimniń sózinshe, ákimdik birinshi kezekte jergilikti turǵyndardyń jaǵdaiyn jasaýy shart. Sonymen qatar ákim apparat basshysyna jinalystar sanyn qysqartyp, barlyq máseleni telefonmen sheshýdi tapsyrdy.
"Aýdan ákimderi men basqarma basshylaryn ákimdik ǵimaratyna shaqyryp, jinalys ótkizý degendi azaitý kerek. Tapsyrmalar barynsha tek telefon arqyly berilsin. Sebebi ol jemqorlyqpen bailanysty. Máselen, men tapsyrmany telefonmen berýge múmkindigim bola tura, nege basqarma basshysyn nemese basqasyn kabinetime shaqyrýym qajet? Maǵan kóp adamdar "qabyldaýyńyzǵa kireiin dep edik" degen maqsatpen habarlasady. "Nege?" desem, "Telefonmen aitatyn nárse emes"dep jaýap beredi. Men ondailarǵa "Eger telefonmen aita almasań, onda múldem kelýdiń qajeti joq" deimin. Durys pa? Sondyqtan men telefon arqyly sheshilmeitin másele zańsyz dep oilaimyn. Quzyrly organdaǵylar ony tyńdap qoimasyn dep kabinetine keledi, qaǵazǵa jazyp, osyny jasap berińizshi deidi. Jeter endi, menińshe, buǵan shekteý qoiý qajet", — dedi Ǵabidolla Ábdirahymov.
