QR Densaýlyq saqtaý birinshi vitse-ministri Marat Shoranovtyń aitýynsha, keiingi kezde shylym shegetin qazaqstandyqtardyń sany azaiyp keledi, dep habarlaidy QazAqparat.
Bul týraly ol ortalyq kommýnikatsiialar qyzmetinde ótken brifingide aitty.
«2020 jyly «Halyq densaýlyǵy jáne densaýlyq saqtaý júiesi týraly» kodeks qabyldandy. Bul qujatta temekige qarsy sharalardy retteý kózdelgen. Temekiniń IQOS, Glo, veip siiaqty túrlerin kádimgi shylymǵa teńestirý, temekini búkil saýda oryndarynda kórneki jerge shyǵaryp qoiýǵa tyiym salý, qoǵamdyq orynda qorqor tartýǵa tyiym salý, nasybai siiaqty «tútinsiz» shylymnyń ainalymyna tyiym salý, sondai-aq temeki satyp alýǵa quqyly azamattardyń jasyn 18-den 21-ge kóterý baǵytynda normalar qabyldandy», - dep eske saldy vitse-ministr.
Onyń aitýynsha, qabyldanǵan sharalar temeki ónimderiniń dástúrli túrin tutyný kólemin qysqartqan.
«Qazaqstandyqtardyń 70% shylym shegýge tyiym salý jáne temeki tútininen azat orta qurý bastamasyn qoldaidy. Ulttyq zańnamanyń Dúniejúzilik densaýlyq saqtaý uiymy konventsiialarynyń aiasynda qabyldaǵan talaptaryn oryndaý tiimdi dep esepteimiz. Onyń ishinde «qyzdyrylatyn» temeki de bar», - dedi Marat Shoranov.
