Óskemende temeki shegý er adamnyń qaza bolýyna sebepshi boldy, dep habarlaidy "Ult aqparat" oblystyq tótenshe jaǵdailar departamentine silteme jasap.
Búgin túnde Óskemen qalasynda Ahmer kenti aýdanyndaǵy Kommýnalnaia kóshesinde ekipáterli úiden órt shyqqan. Qonaq bólmedegi jihaz, túsqaǵaz, tóbe, jeke zattary men turmystyq tehnika órtengen.
Órt sóndirýshiler 15 sharshy metrdegi órtti aýyzdyqtady. Oqiǵa ornynan 1985 jyly týǵan páter iesiniń kúiip ketken denesi tabyldy.
«Tilsiz jaýdyń sebebi - sónbei qalǵan temeki tuqylynyń divan men kiimge túsip, janýy. Qaza bolǵan adamnyn ápkesiniń aitýynsha, marqum mas bolǵan» delingen habarlamada.
ShQO tótenshe jaǵdailar departamentiniń málimetinshe, temeki shegý kezindegi abaisyzdyq pen nemqurailyq – órt tutanýynyń eń jii kezdesetin sebepteriniń biri.
«Temeki tuqyly janǵysh material betine túskende ol jer byqsyp jana beredi, al temeki qaldyǵy sónip qalady. Byqsý oshaǵy qolaily jaǵdai týyndaǵan kezde órtke ulasýy yqtimal. Temekini jatyp shegý óte qaýipti, ásirise mas kúide. Adamdar temeki qaldyǵy túsken jer janyp jatqan kezde shyǵatyn ýly gazǵa tunshyǵyp óledi. Ókinishke qarai, temeki shegýshiler qarapaiym órt qaýipsizdigi erejelerine selqostyq tanytady jáne osylaisha óz ómirin qaterge tigedi» dep eskertedi vedomstvodan.
