Shyǵys Qazaqstanda tehnotýrizm salasyn damytý maqsatynda elimizdegi alǵashqy joba ázirlenip jatyr, dep habarlaidy "Ult aqparat".
«Tehnotýrizm - qazir álemde joǵary suranysqa ie týrizmniń bir salasy. Al Qazaqstanda týrizmniń bul salasy sonshalyqty tanymal emes. Osy turǵyda biz alǵash bolyp qolǵa alýdy jón kórdik. Tehnotýrizm - belgili bir oqiǵa oryn alǵan jer, ol múmkin jer silkinisi, iadrolyq jarylys nemese ekologiialyq apat oryn alǵan aimaq bolýy múmkin. Mysal keltirsek, Ýkrainadaǵy Chernobylǵa jylyna milliondaǵan týrist barady. Atalǵan týrizm salasyn qolǵa alýdyń negizgi eki sebebi bar. Ol aldymen, tarihpen tanysý, iaǵni ótkendi umytpaý. Ekinshiden, otandyq jáne sheteldik týristerdi tartýdyń bir amaly», - dedi ShQO Týrizm basqarmasy basshysynyń mindetin atqarýshy Inara Boidýkova.
Onyń aitýynsha, búginde oblystyq Týrizm basqarmasy tehnotýrizmdi júzege asyrýdyń jobasyn ázirleý ústinde.
«Joba ázirlengen soń, ony bekitýge jiberemiz. Qabyldanǵan jaǵdaida jaqyn jyldary iske asyrýdy bastaimyz. Muny týrizmniń tabys ákeletin salasy dep aitýǵa bolady. Óitkeni, biz belgili bir nysanǵa ekskýrsiia uiymdastyryp qana qoimai, ár týristi qaýipsizdik jáne meditsinalyq turǵydan saqtandyrýmen qamtamasyz etemiz. Odan bólek, atalǵan nysanǵa barýǵa ruqsat beretin tiisti qujattar bolýy tiis. Al ol óz kezeginde biraz ýaqyt pen qarajatty talap etedi. Bizdiń aimaqtaǵy tehnotýrizm úshin basty nysan bolyp tabylatyn ol - Semei poligony. Qazirdiń ózinde poligonǵa otandyq jáne sheteldik týristerden suranys bar. Oǵan dálel, buǵan deiin jeke týristik agenttikter arqyly Semei poligonyna barǵan týrister bar», - dedi ol.
I.Boidýkovanyń málimetinshe, atalǵan jobany elimiz boiynsha Shyǵys Qazaqstan alǵash qolǵa alyp otyr jáne ol kópjyldyq jospardan turady.
Aita ketsek, «Kazakh Tourism» ulttyq kompaniiasynyń muryndyq bolýymen elimizde onkúndik aqparattyq týr ótti. Maqsaty - ishki týrizmniń potentsialyn arttyrý jáne dáripteý. Oǵan elimizdiń batys óńirlerinen, atap aitqanda, Atyraý, Aqtóbe, BQO jáne Mańǵystaý oblystaryndaǵy týristik agenttik ókilderi qatysty. Olar Nur-Sultan, Almaty, Shymkent qalalary men Almaty, Túrkistan, Shyǵys Qazaqstan jáne Aqmola oblystarynyń týristik nysandary men saýyqtyrý keshenderiniń jumysymen tanysa otyryp ózara tájiribe almasty.
