Shyǵys Qazaqstan oblysyndaǵy birqatar qala, aýdandarda karantin shekteýleri alynyp tastalmaq, dep habarlaidy "Ult aqparat".
Bul jaily aimaq basshysy Danial Ahmetov óziniń Instagram paraqshasynda jazdy.
«Sońǵy eki ai bárimizge ońaiǵa túspedi. Bul bilik organdarynyń batyl ári naqty is-áreketteriniń kezeńi boldy. Biz halyqqa barlyq talaptardy oryndaýda túsinistik, shydamdylyq jáne adal niet tanytqany úshin alǵys aitamyz. ShQO – koronavirýs juqtyrý kórsetkishi eń tómen óńirlerdiń biri. Osyǵan orai 16 mamyrdan bastap qalypty ómirge kóshe bastaimyz. Turǵyndardyń dalaǵa tek ruqsattamamen shyǵýyna jáne kólik qozǵalysyna qatysty shekteýlerdiń barlyǵy alynady. Aýmaǵy 2000 sharshy metrge deiingi barlyq tolaiym jáne azyq-túlik satpaityn saýda oryndary óz jumysyn bastaidy. Qonaqúiler tolyqqandy jumys tártibine kóship, Alakól demalys bazasyna aldyn ala joldama alýǵa ruqsat beriledi. Mamyr aiynyń 15-inen áýe reisteri men temirjol vokzaldarynda bilet satý bastalady. Jalpy aýmaǵynyń 30 paiyzy ǵana qamtylǵan jaǵdaida dini oryndarǵa barýǵa ruqsat etiledi», - deidi ákim.
Onyń aitýynsha, meiramhanalar, dámhanalar jáne basqa da tamaqtaný oryndary jumysyn bastaidy. Ázirge tek jazǵy alańdar ashylady. Sonymen qatar onda jinalatyn adam sany bir ýaqytta 30-dan aspaýy kerek.
«Altai, Kúrshim, Katonqaraǵai, Zaisan, Kókpekti aýdandary men Ridder qalasynda barlyq bilim ortalyqtary men balabaqshalar jumysyn qaita jalǵastyrady. Biliard bólmeleri, karaoke, klýbtar, boýling ortalyqtary, barlar da ashylady. Biraq Semeiden jáne basqa da aýdandardan karantin sharalaryn tolyqtai alyp tastaýǵa áli erte. Osyǵan bailanysty ázirge oblys shekarasyndaǵy blokpostar alynbaidy», - deidi Danial Ahmetov.
