Shveitsariiada jeksenbide ótken referendýmge qatysqandardyń kópshiligi qoǵamdyq orynda adamnyń bet-júzin jabatyn kiimmen júrýge tyiym salýdy qoldaǵan. SFR teleradiokorporatsiiasy men Tagesanzeiger basylymynyń aldyn ala esebi boiynsha, Shveitsariia konfederatsiiasynyń 26 kantonyndaǵy turǵyndardyń 51 paiyzdan astamynyń ustanymy osyndai.
Gfs.bern agenttigi áleýmettanýshylary daýys berýdiń túpkilikti qorytyndysy aldyn ala esepteý nátijesinen tym alshaq bola qoimaidy dep boljaidy.
Jappai dini sharadan basqa kezde qoǵamdyq orynda adamnyń bet-júzin oramalmen jaýyp júrýine tyiym salý týraly bastamany Shveitsariia halyq partiiasynyń ońshyl qanatyna jatatyn depýtattar kótergen.
Referendým qorytyndysy resmi túrde bekitilgennen keiin Shveitsariia konfederatsiiasy konstitýtsiiasynda qoǵamdyq orynda qandai kiimmen júrýge bolatyny jazylmaq. Reseidiń "Novaia gazeta" basylymy qazirdiń ózinde Shveitsariia zańy áieldi betin búrkemelep júrýge májbúrleýge tyiym salatynyna nazar aýdarady.
8,6 million halqy bar Shveitsariiada, 2018 jylǵy málimet boiynsha, 450 myńǵa jýyq adam, iaǵni turǵyndardyń 5,3 paiyzy islam dinin ustanady.
Bul elde tike demokratiia júiesi aiasynda referendýmdar men búkilhalyqtyń daýys berý birneshe ai saiyn ótip turady. 100 myń adamnyń qoldaýyn tapqan kez kelgen máseleni daýysqa qoiýǵa bolady.
