Shveitsariiada qazaqtyń uly aqyny Abaidyń 175 jyldyǵyna jáne túrki filosofy Əbý Nasyr əl-Farabidiń 1150 jyldyǵyna arnalǵan mereitoilyq poshta markalary shyǵaryldy, dep habarlaidy QazAqparat.
QR Syrtqy ister ministrliginiń málimetine sáikes, poshta markalaryn shyǵarý bastamasyn Qazaqstannyń Shveitsariiadaǵy Elshiligi kótergen. Diplomatiialyq ókildik markalardy kúndelikti iskerlik hat almasýda qoldanatyn bolady. Sondai-aq olardy Shveitsariia boiynsha taratý jóninde kelissózder júrgizilýde.
Aita ketsek, atalmysh elde halyqaralyq filateliialyq kórmeler birneshe ret ótken bolatyn. Bul memlekettiń poshtasy men poshta markalary eldiń basty brendteri sanalady. SwissPost markalary kollektsionerler men týrister arasynda óte tanymal. Al bul kompaniianyń hat ainalymy jylyna 2 mlrd hatqa deiin jetedi.
«Shveitsariiada zamanaýi tsifrlyq tehnologiialar men elektrondyq qyzmetterdiń joǵary damýyna qaramastan, poshta eń tanymal bailanys resýrstarynyń biri bolyp tabylady. Bul tek eldiń azamattary men turǵyndaryna ǵana emes, sonymen qatar kompaniialar, halyqaralyq uiymdar, federaldy, kantondyq jáne mýnitsipaldy organdarǵa da qatysty», - delingen SIM málimetinde.
