Shveitsariia men Ózbekstan kelisimge qol qoiyp, oǵan sáikes Gúlnara Karimovanyń shveitsariia bankterindegi esepshotta qalǵan 131 million dollary ózbek jaǵyna qaitarylady. Bul týraly Shveitsariia úkimetiniń habarlamasynda aitylady.
Kelisim talaptaryna sáikes, Tashkent qaitarylǵan aqshany qalai jumsaǵanyn ashyq jariialap, esep berip otyrýy tiis, aktivter "halyqtyń jaǵdaiyn jaqsartatyn", eldiń turaqty damýyn qamtamasyz etetin jobalarǵa jumsaýy tiis.
Gúlnara Karimovanyń ústinen qozǵalǵan qylmystyq is aiasynda taǵy 715 million dollar buǵattaýly kúide qalǵan. Bul qarjy da aldyńǵy shartpen Ózbekstanǵa qaitarylýy múmkin. Qańtar aiynda Ózbekstan bas prokýratýrasy Karimova isi aiasynda Shveitsariiaǵa 70 óner týyndysyn qaitaratynyn málimdegen.
Ózbekstanda Karimova "aqsha jymqyrý" jáne "bopsalaý" baptary boiynsha sottalǵan. 2012 jyly Shveitsariianyń federaldyq prokýratýrasy qylmystyq iske bailanysty Karimovanyń shamamen 879 million dollaryn buǵattaǵan edi. Byltyr bul somanyń 131 million dollary kámpeskelengen bolatyn.
Biyl mamyr aiynda Frantsiia Ózbekstanǵa Karimovanyń 10 million dollaryn qaitarǵan. Bul qarajat Ózbekstannyń memlekettik biýdjetine aýdarylǵan jáne jalpy maqsatta jumsalyp jatyr.
Ózbekstan biligi aktivti qaitarý boiynsha Shveitsariia, AQSh, Frantsiia, Resei Federatsiiasy jáne ózge elderdiń quzyrly organdarymen jumys istep jatyr. Aqparat boiynsha, másele Karimovanyń 1,3 milliard dollar aktivi jaily bolyp otyr.
Ózbekstannyń birinshi prezidenti Islam Karimov qaitys bolǵannan keiin 2017 jyly qyzy Gúlnara Karimova Ózbekstanda 10 jylǵa bas bostandyǵynan aiyrylǵan bolatyn. Oǵan "salyqtan jaltardy", "qarjy jymqyrdy", "bopsalady", "ofshor kompaniiasynyń qujattaryn joidy" degep aiyp taǵyldy. AQSh pen Eýrodaqtyń birneshe eli Karimovany qarjy jymqyrdy dep aiyptaǵannan keiin Ózbekstanda eks-prezidenttiń qyzynyń ústinen is qozǵalǵan.
Karimovaǵa alǵash ret sot úkimi shyqqannan keiin ol biraz ýaqyt úiqamaqta otyrdy, biraq 2019 jyly naýryzda "úiqamaq erejesin buzdy" dep aiyptalyp, Tashkent oblysyndaǵy túrmege jiberildi. Karimova men onyń qyzy bul aiyptardy joqqa shyǵardy. Osydan soń Karimovanyń ústinen ekinshi qylmystyq is qozǵalǵan.
Úshinshi qylmystyq is boiynsha ol 13 jyl 4 aiǵa bostandyǵynan airylǵan. Karimovaǵa jáne onymen birge sottalǵan taǵy birneshe adamǵa "qylmystyq qaýymdastyq quryp, aqsha bopsalaý, biýdjet qarjysyn jymqyrý, qylmystyq jolmen alynǵan qarjyny zańdastyrýmen bailanysty qylmys jasady" degen aiyptar taǵyldy.
