Shveitsariia "júzdegen million dollar jymqyrdy" dep aiyptalǵan Almatynyń burynǵy ákimi Viktor Hrapýnovqa taǵylǵan aiypty alyp tastady. Bul aqparatty Jeneva prokýratýrasyna súiengen Reuters agenttigi habarlady.
Qylmystyq isti toqtatý týraly sot qaýlysy taraptarǵa 14 qarashada berilgen. Oǵan qatysty 25 qarashaǵa deiin shaǵym túsirilýi múmkin.
Aqparat boiynsha, bul is Qazaqstan biliginiń Shveitsariia biligine quqyqtyq kómek kórsetý týraly suraýy negizinde qozǵalǵan. Qujatta Viktor Hrapýnovtyń 90-jyldardyń sońy 2000-jyldardyń basynda Almaty ákimi bolyp turǵan kezde "qyzmettik ókiletin paidalanyp biýdjet qarjysyn jymqyrǵany" jaily aitylǵan. 2013 jyldan beri jalǵasyp kele jatqan iste Hrapýnovtan bólek onyń otbasy músheleri jáne taǵy bir oligarhtyń aty atalady. Reuters "tanymal oligarhtyń" atyn aitpaidy.
Viktor Hrapýnovtyń ózi Facebook jelisinde Shveitsariianyń Tages Anzeiger basylymyna silteme jasap, sot sheshiminiń 12 qarashada shyqqanyn jazdy.
2018 jyly qazan aiynda Almatynyń qylmystyq ister jónindegi mamandandandyrylǵan aýdanaralyq soty Viktor Hrapýnovty "jemqorlyq" jáne "aqsha jymqyrý" baptary boiynsha kináli dep taýyp, syrttai 17 jylǵa sottaǵan. Sot onyń múlikterin kámpeskeleýdi tapsyrǵan. Onyń áieli Leila Hrapýnova da sol kezde syrttai 14 jylǵa sottaldy. Sot materialdary boiynsha, olardyń "qylmystyq áreketteriniń kesirinen memleketke 250 million dollar kóleminde shyǵyn kelgen".
Viktor Hrapýnovtyń ózi taǵylǵan aiyptardy moiyndamaǵan. 2007 jyly otbasymen birge Qazaqstannan ketken Hrapýnov qazir Shveitsariiada turyp jatyr.
Reuters agenttigi Hrapýnov týraly jańalyqtyń sońynda Shveitsariia Prezidenti Ýli Maýrerdiń juma, 22 qarashada Qazaqstanǵa sapary bastalatynyn, taraptar eki memleket arasyndaǵy qarym-qatynas pen áriptestik jaiyn talqylaitynyn jazǵan.
