Shveitsariia Pfizer jáne BioNTech koronavirýs vaktsinasyn óndirýshi kompaniialarmen 3 mln doza preparat satyp alý týraly kelisimge qol qoidy, dep habarlaidy "Ult aqparat".
Bul – Shveitsariianyń COVID-19 vaktsinalaryn ázirleýshilerimen jasaǵan úshinshi sharty. Buǵan deiin amerikalyq Moderna farmatsevtika kompaniiasynyń 4,5 mln doza vaktsinasyn jáne britaniialyq-shvedtik AstraZeneca firmasymen taǵy 5,3 mln doza satyp alýǵa shart jasalǵan bolatyn.
Pfizer/BioNTech vaktsinasy bir adamǵa eki dozany qajet etetinin eskere otyryp, alǵashqy vaktsinatsiia Shveitsariianyń 1,5 million turǵynyn qamtityn bolady.
Shveitsariia úkimetiniń press-relizinde «Covid-19 vaktsinalarynyń sapasy, qaýipsizdigi jáne tiimdiligi óte mańyzdy» delingen. Olardy Swissmedic memlekettik organy maquldaýy tiis jáne ony Federaldy densaýlyq saqtaý basqarmasy paidalanýǵa usynýy kerek.
Shveitsariia koronavirýs vaktsinalaryn jetkizýdi qamtamasyz etý úshin 400 million shveitsariialyq frank (448 million AQSh dollary) bóldi. Dári-dármekter tegin taratylady, halyqtyń osal toptary men meditsina qyzmetkerlerine basymdyq beriledi. Ásker vaktsinalardyń qoryn qamtamasyz etýge jáne taratýǵa, sondai-aq vaktsinatsiia ortalyqtaryn qurýǵa qatysady.
