Tennisten Qazaqstan áielder quramasynyń kapitany Iaroslava Shvedova Tokio Olimpiadasy qarsańynda óz oiymen bólisti, dep habarlaidy "Ult aqparat".
Qazaqstan tennis federatsiiasy málim etkenindei, bul Shvedovanyń sporttyq jolyndaǵy úshinshi Olimpiadasy bolmaq.
Iaroslava Shvedova Olimpiadaǵa qatysyp, el namysyn qorǵaý zor mártebe ekendigin, qazirgi kezde oǵan qyzý daiyndalyp jatqanyn jetkizdi.
«Olimpiadany «Úlken dýlyǵa» týrnirlerimen salystyrýǵa bolmaidy. Óitkeni bul dúniejúzilik doda tórt jylda bir ret ótedi. Oǵan irikteýden ótýdiń ózi qiyn. «Úlken dýlyǵa» jarystarynda ár sportshy ózi úshin, al Olimpiadada eli úshin synǵa túsedi. Sondyqtan jaýapkershilik aýqymy da úlken. Halyq úshin, Qazaqstan olimpiadalyq quramasy úshin jarys alańyna shyǵý ońai emes. Mine, osy eldik namys bizdi alǵa jeteleidi, júlde úshin kúresýge yntalandyrady.
Qazaqstan týy astynda dodaǵa túsken saiyn erekshe sezimge bólenesiń, tek jeńý ǵana oiyńda turady», dedi Shvedova.
