Foto: © AP Photo / Joe Coomber /
Qyrǵyzstannyń Syrtqy ister ministrligi Astanada qyrǵyzstandyqty soqqyǵa jyǵý oqiǵasy boiynsha isti baqylaýǵa aldy. Bul týraly atalǵan vedomstvo málim etti, dep habarlaidy Kabar agenttigi.
Ministrlik taratqan aqparatqa sáikes, 18 maýsymda Astanadaǵy "MEGA Silk Way" saýda oiyn-saýyq ortalyǵynda Qyrǵyzstan men Qazaqstan azamaty arasynda janjal týyndaǵan. Saldarynan qyrǵyzstandyqqa kúsh qoldanylǵan.
"2023 jyly 13 shilde kúni jábirlenýshi K.A. Qyrǵyz Respýblikasynyń Qazaqctandaǵy elshiligine shaqyryldy. Elshi D.Diýshekeevpen bolǵan kezdesý kezinde qajetti quqyqtyq kómek usynyldy. Qazirgi kezde osy oqiǵa boiynsha Qazaqstan Respýblikasynyń quqyq qorǵaý organdary qajetti protsessýaldyq sharalardy atqaryp jatyr. Bul másele ministrliktiń baqylaýyna alyndy", - delingen resmi habarlamada.
Aita keteiik, buǵan deiin bokstan álemniń eks-chempiony Beibit Shúmenov Astanadaǵy saýda ortalyǵynda balany ustap otyrǵan er adamdy soqqyǵa jyqqany habarlanǵan. Keiinnen sportshy janjalǵa qatysty pikir bildirdi.
