Shý aýdanynda politsiia qyzmetkerlerine qarsy kúsh qoldanǵan 13 adam politsiiaǵa jetkizildi. Olardyń arasynda 2 qyz da bar, dep habarlaidy QazAqparat.
Aǵymdaǵy jyldyń 7 mamyryna qaraǵan túni Jambyl oblysy Shý aýdanynyń politsiia bólimine bir top adamnyń politsiia qyzmetkerlerine qatysty kúsh qoldanǵany týraly habarlama kelip túsken.
Shý qalasynyń kólik beketi mańyndaǵy alańqai janynda patrýldik politsiia qyzmetkerleri «VAZ-21014» markaly avtokóligin aldyńǵy jaǵynda memlekettik nómiri bolmaǵandyqtan toqtatqany anyqtaldy.
Mán-jaidy anyqtaý barysynda avtomashinanyń júrgizýshisi men jolaýshylary zańdy talaptarǵa baǵynbai, basqa da tanys adamdarymen birlesip, bilik ókilderine qarsylyq kórsetken.
«QR QK 380-babynyń 3-bóligi (bilik ókilderine kúsh qoldaný) boiynsha sotqa deiingi tergeý amaldary bastaldy.
Shý aýdanynyń politsiia bólimine 13 adam, onyń ishinde 2 qyz jetkizildi.
Qaqtyǵystyń 8 belsendi qatysýshysy ustaldy, 6 adamǵa «kúzetpen ustaý» túrindegi bultartpaý sharasy tańdaldy, al qyzdarǵa qatysty úi qamaǵyna alýǵa sanktsiia berildi», - delingen politsiia departamenti baspasóz qyzmetiniń habarlamasynda.
Vedomstvo habarlamasynda qylmystyń taǵy bir belsendi qatysýshysyna qatysty «qamaýda ustaý» túrindegi bultartpaý sharasymen izdeý jariialanǵandyǵy aitylǵan.
Qazirgi ýaqytta politseilerdiń densaýlyǵyna ziian keltirý dárejesin anyqtaý maqsatynda sot-meditsinalyq saraptamasy taǵaiyndalǵan.
