Elimizde qurǵaq shubat pen qymyzdy Qytaiǵa eksporttaǵysy keletin kásipkerler bar. Qytai tarapynan da bul ónimderge qyzyǵýshylyq joǵary. Bul týraly Dúniejúzilik standarttar kúnine orai ótken forýmda aityldy, dep habarlaidy QazAqparat.
«Qurǵaq shubatqa keletin bolsaq, Túrkistan oblysynda Golden Camel dep atalatyn úlken investitsiialyq joba bar. Búgingi forýmda aityp ótkenimdei, ol kompaniianyń ónimderi Qytai standarttaryna sai», - deidi «Qazaqstan standarttaý jáne sertifikattaý institýty» RMK bas direktorynyń orynbasary Erkejan Ámirhanova.
Budan bólek, Qytaidyń standarttaý organy - sút ónimderi qaýymdastyǵy standarty negizinde ulttyq standartyn jasaýdy qolǵa alǵan.
«Qytai standartyn qazaqstandyq ónimge qoldanýǵa ruqsat alýymyz kerek boldy. Qajetti qujatty jiberip, ruqsat aldyq. Bul qazaqstandyq kompaniia Qytaidaǵy sút ónimderi qaýymdastyǵy standartyn qabyldaý quqyǵyn aldy. Búgingi tańda qurǵaq shubat Aýyl sharýashylyǵy ministrligi veterinarlyq talaptar boiynsha qol qoiǵan hattamaǵa kirdi. Bul hattama osy ónimdi eksporttaýǵa jol ashady», - deidi Erkejan Ámirhanova.
Sondai-aq, Erkejan Maǵaýinqyzy Qytaida qurǵaq shubatqa qatysty standart joq ekenin aitty.
«Qymyz – erekshe ónim. Qytailar bul ónimdi kóp tutyna bermeidi, biraq búgingi tańda qyzyǵýshylyq artyp keledi. Olarda qymyzǵa qatysty standart joq bolǵandyqtan, ózimizdiń ulttyq standartymyzdy usynyp, qytai tiline aýdaryp berdik. Odan keiin bul standart Qytaidyń densaýlyq saqtaý ministrliginde talqylanyp, arnaiy zertteýden ótedi», - deidi ol.
Qytaidyń densaýlyq saqtaý ministriligi tamaq ónimderiniń qaýipsizdigine qatysty qosymsha talaptar qosýdy usynǵan.
«Biz olardyń talabyn oryndadyq, endi jaýap kútip otyrmyz. Olar bizdiń ulttyq standart negizinde qymyzǵa qatysty Qytaidyń ulttyq standartyn jasaidy. Tehnikalyq talaptardy oryndaý óte mańyzdy. Qytailar úshin qymyzdyń dáminiń ashylyǵy tańsyq dúnie boldy. Al bul - biz úshin qalypty jaǵdai», - deidi Erkejan Ámirhanova.
