Shyńjań Uiǵyr avtonomiialyq aimaǵynyń (ShUAA) Qashǵar okrýginiń barlyq halqy koronavirýstyń bar-joǵyn anyqtaityn testileýden ótedi, dep habarlaidy "Ult aqparat" densaýlyq saqtaý isteri jónindegi jergilikti komitettiń málimdemesine silteme jasap.
Jeksenbi kúni ShUAA Qashǵar okrýginiń 2,8 millionnan astam turǵyny koronavirýs testileýinen ótti. 137 simptomsyz aýrý tasymaldaýshy anyqtaldy. Barlyǵy 4,7 mln adam testileýden ótýi tiis, ony jergilikti bilik osy seisenbide aiaqtaýdy josparlap otyr.
Ótken senbide ShUAA biligi Qashǵar okrýginde jergilikti turǵyndar arasynda simptomsyz juqtyrýdyń bir oqiǵasy anyqtalǵannan keiin qalyptasqan epidemiologiialyq jaǵdaiǵa shuǵyl den qoiý rejimin engizdi. Sonymen, josparly tekserý barysynda 17 jastaǵy qyzdyń koronavirýsqa testi oń nátije kórsetti. Qyz jergilikti toqyma kásipornynda jumys isteidi jáne sońǵy jyly aimaqtan tys jerlerge shyqpaǵan.
Tigin fabrikasynyń basqa 831 qyzmetkeriniń testteri oń nátije kórsetpedi, alaida qyzdyń tanystary men onyń ata-analaryn, sondai-aq olarmen bailanysta bolǵan adamdardy tekserý barysynda aýrýdyń taǵy 137 simptomsyz tasymaldaýshysy anyqtaldy.
ShUAA Qashǵar okrýginde qoǵamdyq densaýlyq salasyndaǵy kúrdeli tótenshe jaǵdailarǵa den qoiýdyń birinshi deńgeii engizildi.
Eske sala keteiik, shilde aiynyń ortasynda ShUAA ákimshilik ortalyǵy Úrimji qalasy koronavirýstyń oshaǵyna ainalǵan edi, sodan keiin jergilikti bilik 40 kúnge sozylǵan lokdaýn engizdi.
