Úkimettiń búgingi otyrysynda «Qazaqstan temirjoly» ulttyq kompaniiasynyń basshysy Qanat Alpysbaev tekserýdiń aldyn ala nátijesin jariialady, dep xabarlaidy "Ult aqparat".
«Buǵan deiin poiyzdyń olai joldan shyǵyp ketý oqiǵalary bolmaǵan. Sebebi texnikalyq jaǵynan túsiniksiz jaittar kóp. Atap aitqanda, jolaýshylar poiyzy túzý jolda aýdarylyp ketken. Sosyn ol jerdegi temirjoldyń diagnostikasy aǵymdaǵy jyly 6 maýsym kúni júrgizildi. Sol kezde eshqandai kemshilikter anyqtalmaǵan. Atalǵan ýchaskede saǵatyna 100 shaqyrymmen júrýge bolady. Al qulaǵan poiyz 93 shaqyrymmen júrgen. Negizi, relster jáne basqa da qosymsha bólshekter tek 60 protsentke paidalanylǵan bolatyn», - dedi Q.Alpysbaev. Búginde kompaniia basshysy apat bolǵan jerde júr. Óz baiandamasyn ol onlain bailanys arqyly jasady.
Onyń aitýynsha, Shýdaǵy apat boiynsha tekserý jumystary jalǵasýda. Oǵan otandyq jáne reseilik mamandar tartylyp otyr. «Komissiia qatar turǵan jolmen júk poiyzyn júrgizip kórdi. Osy synaqtyń nátijesinde jolaýshylar poiyzynyń joldan shyǵyp ketýine basqa poiyzdyń áser etpegeni anyqtaldy», - dep atap kórsetti Q.Alpysbaev.
Aita keteiik, tekserý komissiianyń jumysy osy aidyń aiaǵyna deiin jalǵasady. «Qazaqstan temir joly» ulttyq kompaniiasy qaitys bolǵan jasóspirimniń otbasyna 2 405 000 teńge kóleminde ótemaqy tólep beredi. Budan bólek, jaraqat alǵan azamattarǵa 500 000 - 1 000 000 teńge kóleminde ótemaqy beriledi.
