Byltyr jemqorlyq qylmysynyń denin ákimdik, ishki ister organdary men kvazimemlekettik sektor qyzmetkerleri jasaǵan. Bul týraly búgin memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev málimdedi, dep habarlaidy Sputnik Qazaqstan tilshisi.
"Ótken jyly jemqorlyq sipattaǵy 1835 zań buzýshylyq tirkeldi, bul 2016 jylmen salystyrǵanda 18 paiyzǵa az. Buǵan, eń aldymen, aýyr jáne asa aýyr qylmys túrleri men júieli jemqorlyqqa basa nazar aýdarý septigin tigizdi. Bul jumysta agenttik pen azamattyq qoǵamnyń atqarǵan róli óte zor. Úilesimdi jumystyń nátijesinde 108 júieli jemqorlyq faktisiniń joly kesildi, ol boiynsha 320 adam qylmystyq jaýapqa tartyldy. Óńirler arasynda mundai faktiler Almaty, Qyzylorda, Atyraý, Jambyl, Qaraǵandy, Shyǵys Qazaqstan oblystary men Almaty qalasynda kóp tirkeldi", — dedi Shpekbaev búgin ótken alqa otyrysynda.
Sondai-aq, agenttik tóraǵasynyń aqparatynsha, 4 uiymdasqan qylmystyq toptyń joly kesilgen. Memleketke keltirgen 15,8 milliard teńge zalaldyń 14 milliardy nemese 88 paiyzy qaitaryldy.
"Jemqorlyq qylmysynyń eń kóp taralǵan túri – paraqorlyq, aqsha jymqyrý jáne qyzmettik ókilettigin teris paidalaný. Respýblikalyq deńgeidegi 19, oblystyq deńgeidegi – 98, qalalyq jáne aýdandyq deńgeidegi 152 basshy qylmystyq jaýapkershilikke tartyldy. Qylmystyń denin ákimdikter, ishki ister organdary men kvazimemlekettik sektor qyzmetkerleri jasaǵan. Jemqorlyqtyń joǵary deńgeii bilim, aýyl sharýashylyǵy, qurylys jáne densaýlyq saqtaý salasynda saqtalyp tur. Munyń bári memlekettik organdar men mekemeler basshylarynyń kóp jaǵdaida jemqorlyq táýekelderin joiýǵa nemqurailylyq tanytýynan nemese jaǵdaidy ózgertýge qaýqarsyzdyǵynan bolady. Sondyqtan biz premer-ministrdiń jáne QR Prezidenti ákimshiligi basshysynyń atyna júieli jemqorlyqqa qarsy is-qimylǵa qatysty sharalar qabyldamaǵan ortalyq jáne jergilikti memlekettik organdardyń basshylaryn tártiptik jaýapkershilikke tartý týraly usynym engizý týraly sheshim qabyldadyq", - dedi Shpekbaev.
