QR Memlekettik qyzmet isteri jáne sybailas jemqorlyqqa qarsy is-qimyl agenttiginiń tóraǵasy Alik Shpekbaev Shymkentte jumys ýaqytyn tańǵy segizden bastap, túski úzilisti qysqartýdy usyndy. Bul týraly agenttik tóraǵasy atalǵan qalaǵa jumys sapary barysynda aitty, dep habarlaidy QazAqparat tilshisi.
Qala aktivimen kezdesken agenttik tóraǵasy memlekettik qyzmetkerler úshin jańa jumys kestesin jasaýǵa shaqyrdy.
«Memlekettik qyzmet salasyndaǵy úzdik tájiribelerge súiene otyryp, biz Shymkent qalasy ákiminiń apparatyna juma kúni jańa jumys kestesin pilottyq rejimde engizýdi usynamyz. Iaǵni, jumys kúni tańǵy saǵat 8:00-de bastalyp saǵat 16:00-de aiaqtalatyn bolady. Osylaisha, 8 saǵattyq jumys kúni saqtalady. Jáne bul jumys kestesin pilottyq rejimde Shymkentten bastaýdy usynamyn. Sebebi, Shymkent - eń kreativti qala», - dedi agenttik tóraǵasy.
Ákim óz kezeginde aitylǵan usynysty qoldap, agenttik tóraǵasyna senim artqany úshin alǵysyn bildirdi.
Memlekettik organdar basshylarynyń qatysýymen ótken jiynda agenttiktiń Shymkent qalasy boiynsha departamentiniń basshysy Áli Kómekbaev, Sybailas jemqorlyqqa qarsy is-qimyl ulttyq biýrosynyń Shymkent qalasy boiynsha departamentiniń basshysy Murat Qarymsaqov, qala ákimi apparatynyń basshysy Erkeǵali Álimqulov baiandama jasady.
Aita keteiik, kezdesýde sybailas jemqorlyqqa qarsy is-qimyl boiynsha elimizde júzege asyrylyp jatqan saiasat pen azamattardyń qajettiligine baǵyttalǵan memlekettik apparattyń aldaǵy perspektivasy sóz boldy.
