QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev Atyraý oblysyndaǵy ashyqtyq, aiqyndyq jáne eseptilik qaǵidattaryn iske asyrý barysymen tanysty, dep habarlaidy "Ult aqparat".
Agenttik tóraǵasy aldymen Jylyoi aýdanyna baryp, Qulsary qalasyndaǵy halyqty jumyspen qamtý ortalyǵynyń, halyqty áleýmettik qorǵaý jáne jumyspen qamtý bóliminde ashylǵan front-ofistiń jumysyna nazar aýdardy.
«Qazirgi zamanǵy memlekettik apparattyń basty mindeti – klientke baǵdarlaný jáne azamattarǵa qolaily jaǵdaida qyzmet kórsetý. Memlekettik qyzmetshiler turǵyndardyń ótinish-tilegin muqiiat tyńdaýy kerek. Óitkeni, ár turǵynnyń aldynda biýrokratiialyq qabyrǵa týyndamaýy tiis», - dedi agenttik tóraǵasy Alik Shpekbaev.
Tóraǵanyń aitýynsha, memlekettik organdardyń mundai transformatsiiasy qoǵammen belsendi ózara is-qimyl jasaýdyń jáne memlekettik apparattyń azamattardyń suraý salýyna sezimtaldyǵyn arttyrýdyń túiindi sharty bolýy kerek.
Atyraý oblysynda front-ofister jáne «openspeister» formatynda 45-ten astam memlekettik organ men mekeme jumys isteidi. Elektrondyq memlekettik qyzmetterdi yńǵaily alýdy qamtamasyz etý úshin aýyldyq okrýgter ákimdikteri men mektepterdiń ǵimaratynda ózine-ózi qyzmet kórsetý buryshy ashylǵan. Onda ákimdikterdiń arnaiy qyzmetkerleri men informatika pániniń muǵalimderi azamattarǵa elektrondyq úkimet portalynda qoljetimdi qyzmetterdi óz betinshe alýyna kómektesedi.
Agenttik tóraǵasy Jylyoi aýdanynyń azamattaryn jeke qabyldady. Onda azamattar birneshe ai boiy sheshimin tappaǵan ózekti máselelerimen bólisti.
Al Mahambet aýdanyndaǵy «Azamattarǵa arnalǵan úkimet memlekettik korporatsiiasy» KEAQ filialynyń jańa ákimshilik ǵimaratynda elektrondy qyzmet kórsetý barysymen tanysty. Munda biyl 23 myńnan astam memlekettik qyzmet kórsetilgen. Onyń ishinde ózine-ózi qyzmet kórsetý sektory arqyly elektrondyq onlain-formatta 12 myńnan astam memlekettik qyzmet bar.
QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev Elbasy N. Nazarbaevtyń 2018 jylǵy 5 qazandaǵy Joldaýynda aitylǵan memlekettik qyzmetterdi elektrondyq formatqa kóshirý jónindegi tapsyrmasynyń oryndalǵanyn atap ótti.
«Qazaqstan elektrondyq úkimetti damytý boiynsha 30 eldiń qataryna kiredi. Kórsetiletin qyzmetterdiń 90%-dan astamy halyq úshin onlain formatta beriledi. Iaǵni, qyzmettiń bul túri barsha úshin qoljetimdi. Bul turmystyq sybailas jemqorlyqty barynsha azaitty», - dedi A.Shpekbaev.
