Resei Qorǵanys ministri Sergei Shoigý elimizge sapary barysynda biregei muraǵattyq materialdardy tabys etti. Bul týraly "Ult aqparat" Qorǵanys ministrligine silteme jasap habarlaidy.
Resmi sapar sheńberinde Resei Federatsiiasynyń qorǵanys ministri Sergei Shoigý Qazaqstan Respýblikasy qorǵanys vedomstvosynyń basshysy Nurlan Ermekbaevqa 1941-1945 jyldardaǵy Ekinshi dúniejúzilik soǵysyna qatysqan qazaqstandyqtarǵa qatysty muraǵat materialdaryn tapsyrdy.
Birinshi toptama – «Bir Jeńistiń sarbazdary. Ekinshi dúniejúzilik soǵysy jyldaryndaǵy Qazaqstan».
«Bizdiń muraǵattardan barlyq polkter men bólimshelerdiń tizimderi, olardyń qalai jáne qaida soǵysqany týraly materialdar alyndy. Munda Bas shtab basshylary men sol kezdegi Joǵarǵy Bas qolbasshynyń jáne Stavka jetekshisiniń shynaiy qujattary men sheshimderi berilgen», – dedi Resei Federatsiiasynyń Qorǵanys ministri.
Sondai-aq, Resei qorǵanys vedomstvosynyń basshysy 1941-1942 jyldardaǵy gazettiń bastapqy shyǵarylymyn jetkizdi. Onda Máskeý túbindegi shaiqastarda panfilovshylar týraly alǵashqy málimetter jariialanǵan.
Keńes Odaǵynyń batyry, armiia generaly, Qazaqstannyń birinshi Qorǵanys ministri Saǵadat Nurmaǵambetov týraly materialdar asa baǵaly qundylyqqa ainaldy. Resei ministriniń aitýynsha, muraǵattarda barlyq qolda bar materialdar jinaqtalǵan. Onyń ishinde qazaqstandyq tarap úshin jańalyq bolatyn derekter de bar.
Sergei Shoigý 2020 jyl Ekinshi dúniejúzilik soǵysyndaǵy Jeńistiń 75 jyldyǵy ekenin atap ótti. Maýsym aiynda Qazaqstan áskeriniń bólimshesi Qyzyl alańdaǵy Jeńis sherýine qatysty. Ol sondai-aq Qorǵanys ministrine, Qazaqstan muraǵattar qyzmetkerlerine «Eske alý joly» biregei murajaiyn qurýǵa qosqan úlesi úshin zor alǵys aitty.
