Foto: Aqshamnews.kz
Osy aptada aktrisa Dariǵa Badyqova men onyń 16 jyl nekede bolǵan burynǵy kúieýi Darhan Musaev arasyndaǵy janjal shoý-biznestegi eń qyzý talqylanǵan taqyrypqa ainaldy. «Ýaqyt kórsetedi» baǵdarlamasynda Musaev aktrisamen otbasylyq ómirde kórgen bar qiyndyǵyn jaiyp saldy.
Bárine kináli – milliard
M.Áýezov atyndaǵy Drama teatrdyń burynǵy akteri Darhan Musaev Dariǵa Badyqovaǵa 2008 jyly úilenip, 16 jyl birge turǵan. Aralarynda bala bolmasa da, ekeýin bir óner biriktirgen. Alaida ekeýiniń ustazy Bolat Atabaev «Bir úiden bir ǵana akter shyǵýy kerek» degen qaǵidany ustanǵan jup aldyńǵy shepke Dariǵany shyǵarady. Buǵan da sebep joq emes, Musaevtyń aitýynsha, Dariǵa ony sebepsiz qyzǵanyp, jumys isteýine mursha bermegen. Aqyry áieline jol berip, óziniń sońǵy 3 jylda jumysy týralap qalǵan.
«Taptym-aý seni» filmi kórermenderdiń qoshametine bólenip, 1 mlrd 800 mln kassa jinaǵannan keiin aktrisa kúrt ózgerip, Musaevpen otbasylyq ómirden sharshaǵanyn aityp, «Men keteiinshi» dep ketkennen, qaityp oralmaǵan.
Resmi túrde jup 2024 jyly kúzde ajyrasqan.
«Otbasy bolǵan soń bir múddege jumys istedik. «Menmendik» degen bolmaidy. Kinonyń atyp ketetinin bildik. Men de bir, sen de bir kólik alasyń dep kelistik. Qantardyń 10-15-inde milliard tústi. Men 15 millionǵa kólik taýyp qoiǵanymdy aittym. «Qymbat» dedi. Men 10 millionǵa izdeiin dedim. Sóitip 10 millionǵa taptym. «Mende ondai aqsha joq. Biz bankten sheshe almai jatyrmyz. Arzandaý mashina izdeshi» dedi. Ózim «mynaý túsip bara jatyr ǵoi» dedim. Biraq ózim kelisip sol kólikti aldym. Keiin qansha beredi dep kútip júrdim. «Tym bolmasa 7-8 mln berse eken» dep oiladym. Akterler de óz eńbekaqysyn alady ǵoi. Sóitip 3-4 million, 1 200 000 teńge etip bólip júrip berdi», – dedi Darhan Musaev.
Foto: ashyq derekkóz
«Bul qastandyq»
Osydan keiin aktrisa Instagram-daǵy akkaýntynda óz shyndyǵyn bólisip, aktermen 16 jyldyq ómirde baqytty bolmaǵanyn jaiyp saldy.
«Ótirik baqytty adamnyń keipin tanytqanmyn! Eldiń adamymyn ǵoi dep kóp nárseni ashyp aitpaǵanmyn. Beker jasaǵan ekenmin...»,- dep jazdy ol.
Onyń sózinshe, Darhan Musaevtyń, prodiýserdiń jańa týyndysy – «Ystyq uia» filminiń prokaty tusynda bul máseleni kóterýi – qastandyq.
«Men ajyrasyp ketkeli biraz bolǵan! Artysyp-tartysyp bir úide jái ǵana birge turyp jattyq. Tolyq aitarmyn bárin! Kinoǵa jasap otyrǵan qastandyǵy bul!», - dedi Badyqova.
Artynsha zańger Aigúl Orynbek aktrisamen túsken sýretin jariialap, Darhan Musaevtyń ústinen aryz jazǵandaryn habarlady.
«Dariǵa barynsha sabyrlyq pen túsinistik tanytyp keldi. Biraq otbasylyq qupiiany jariia etý, jeke hat almasýlar men aýdio-videojazbalardy kópshilikke taratamyn dep málimdeý — bul adamnyń ar-namysyna tiip qana qoimai, qylmystyq jaýapkershilikke tartylýy múmkin áreket! Mundai áreket — bopsalaý men qysym kórsetýdiń aiqyn kórinisi. Búgin biz Darhannyń ústinen resmi túrde aryz túsirdik. Bul sheshimge barýǵa májbúr boldyq, sebebi zańsyzdyqqa únsiz qaraý – ádiletsizdikke jol berý degen sóz. Endi bári zań aiasynda, quqyqtyq alańda sheshiledi dep senemiz», - dep jazdy Aigúl Orynbek.
Foto: Facebook.com
Taptym-aý seni?
Dariǵa Badyqova eks-kúieýi «kózime sol aktermen shóp saldy» dep aiyptaǵan, «Taptym-aý seni» filmindegi serigi Oljas Abaimen bas qosty ma, ol jaǵy belgisiz. Degenmen, áleýmettik jelilerde áriptesterdiń túrli merekelik sharalarda birge túsken sýretteri, Dýbai, Stambýl qalalarynda qydyrǵan sátteri jariialanyp jatyr.
Oljas Abaidyń ózi áleýmettik jelide eki jastyń ajyrasyp ketýine sebepker emes ekenin aityp, aqtaldy.
«Nekedegi áielimen ajyraspai jatyp kóz salady degender — meni túsinbegender. Ár nárseniń sońy bolady. Eshkim jaýapsyz qalmaidy. 15 jylda 25-ten asa kinotýyndyǵa túsip, halyqtyń milliondaǵan qoshemetine bólengen akter retinde men óz eńbegimmen jetistikke jettim. "Dariǵadai minezdi, myqty aktrisamen seriktes bolyp jumys istedim. Sol eńbegimdi óner jolyndaǵy jetistik dep bilemin. Basymdy bala kúnnen tik kóterip júrmin, ary qarai da júre beremin», – dep jazdy akter.
Al Áleýmettik jeli qoldanýshylary eki jupqa baqyt tilep, Oljas Abaiǵa aktrisany baqytsyzdyqtan qutqarǵanyna raqmet aityp jatyr.
Aita keteiik, qazir kinoteatrlarda Dariǵa Badyqova prodiýserlik etken «Ystyq uia» filmi júrip jatyr. Kinotýyndynyń rejisseri – Darhan Káripov. Basty rólderde: Dariǵa Badyqova, Oljas Abai, Shamshagúl Meńdiiarova, Erjan Túsipov. Ticketon málimetinshe, atalmysh film alǵashqy aptada 304 869 253 teńge jinap, eń kóp kassa jinaǵan filmderdiń kóshin bastady.
