Prezident jastar kadr rezerviniń úzdik ondyǵyna kirgen Ánýar Nurtazin Memleket basshysynyń aýyl sharýashylyǵyndaǵy jemqorlyqqa qatysty aitqan málimdemesine orai pikir bildirdi, dep habarlaidy QazAqparat.
Onyń paiymynsha, aýyl sharýashylyǵy memlekettik azyq-túlik qaýipsizdiginiń, turaqtylyǵynyń, tipti tutastyǵynyń kepili sanalady.
Sonymen qatar ol halyqty barynsha jumyspen qamtyp otyr. Osy rette fermelerlik degenimiz iri agroholdingten bastap jeke sharýa qojalyqqa deiingi 4 bazalyq qurylymdy bildiretindigin atap ótken jón.
Biraq, memleket tarapynan qarastyrylǵan aýyl sharýashylyǵyn qoldaý sýbsidiiasyn negizinen iri holdingter alyp otyr.
«Bul oraida biz úshin shaǵyn sharýashylyqtardy nemese tipti kishkentai sharýashylyqtardy qoldaý barynsha tiimdi ekendigin túsiný óte mańyzdy. Olar osy ýaqytqa deiin múldem eshqandai sýbsidiia almady desek te bolady. Bul Internettiń, IT-tehnologiialardyń dendep enýimen de bailanysty. IT-salada ázirlenetin barlyq júieniń kúrdeli ekendigin, aýtentifikatsiialaý, verifikatsiialaý jáne basqalaryn jasaýdy talap etetindigin túsinemiz. Al malyn qala úlgisindegi eldi mekennen 30-40 shaqyrym shalǵaidaǵy jailaýda ne qystaýda baǵyp júrgen shaǵyn fermeler jaiynda aitar bolsaq, olarda internet nemese uialy bailanys turmaq elektr jaryǵy da joq», - dedi ol.
Esterińizge sala keteiik, keshe Memleket basshysy Qasym-Jomart Toqaevtyń tóraǵalyǵymen Sybailas jemqorlyqqa qarsy is-qimyl máseleleri jónindegi keńes ótti. Onda Prezident aýyl sharýashylyǵy salasynda beleń alǵan jemqorlyqty synady.
«Bul sala jyldar boiy jemqorlyqqa belsheden batyp otyr. Sonyń kesirinen memleket úlken ziian shekti, azyq-túlik qaýipsizdigine nuqsan keldi. Atap aitqanda, jaiylymdyq jerlerdi sýlandyrýǵa bólingen 80 milliard teńgeniń teń jartysy maqsatqa sai jumsalmaǵan. Byltyr qýańshylyq bolǵan kezde sharýalar jem-shóp tappai, mal qyrylyp qaldy. Tipti, keibir óńirde sharýalarǵa sýbsidiia retinde kún batareiasy berilgen. Ashyǵyn aitqanda, bul batareialar aýyl turǵyndaryna ne qajet ekenine eshkim bas qatyrmaǵan. Sýbsidiiany igerdik dep esep berý úshin sol kún batareialarynyń baǵasy eselep kórsetilgen. Munyń bári ýákiletti organdardyń jaýapsyzdyǵynan bolǵan. Tipti, keide memlekettik organdardyń ózderi tikelei aralasyp, zańsyz áreket jasaǵa», - degen edi QR Prezidenti.
