Búgin qazaq poeziiasynyń kórnekti ókili, belgili aqyn, aýdarmashy, Qazaqstannyń eńbek sińirgen qairatkeri Shómishbai Sariev 75 jasqa qaraǵan shaǵynda jaryq dúniemen qosh aitysty, dep habarlaidy "Ult aqparat".
Onyń esimi óleńsúier, ánsúier qaýymǵa keńinen tanys. Aqynnyń lirikalyq jyrlary men án óleńderi kóptegen qazaq kompozitorynyń shyǵarmashylyǵyna arqaý boldy.
«Shómishbai Sariev – poeziiamyzǵa 70-jyldary kelgen bir top talantty aqyndardyń ortasynda óz óleń órnegi, óz aldyna daýysy á degende belgili bolǵan aqyndardyń biri… Shómishbai – qos qanatty aqyn. Birinshisi, lirikalyq jyrlary bolsa, ekinshisi – án-óleńderi. Poeziianyń eki salasy aqynnyń qos qanatyna ainalǵan», – dep aqyn Ǵafý Qaiyrbekov joǵary baǵa bergen.
Aqynnyń kórkem týyndylary halyq súiispenshiligine bólenip, kóptegen memlekettik jáne qoǵamdyq, ádebi marapattarǵa ie bolǵan. Ol – Qazaqstannyń eńbek sińirgen qairatkeri, «Parasat» ordeniniń iegeri, Frants Kafka atyndaǵy halyqaralyq Altyn medalmen marapattalǵan jáne «Platina Tarlan» syilyǵyn, «Jyl Adamy – Altyn adam», «Halyqtyń súiiktisi» ulttyq syilyǵyn alǵan aqyn.
Shómishbai Sariev 300-den astam halyqqa keń taraǵan án sózderiniń avtory. «Ainaldym senen, Atameken-ai», «Sálem saǵan, týǵan el», «Tolǵaý», «Araldan ushqan aqqýlar», «Dombyra», «Jýsan isi», «Qazaǵymnyń kúileri-ai», «Saryarqa», «Bozjorǵa», «Qazaqstan», «Dos kerek», «Aiaýlym», «Araily Astana», «Aǵa, sensiń – Alataýym», «Saǵynyshym – Astana», «Súiinshi», «Asyl ana», «Ǵashyqtar jyry», «Aqqý senim», «Oilan, balam», «Saǵyndym, saǵym jyldar», «Qairan ýaqyt» taǵy basqa án-óleńderi kópshilik qaýym súiip aitatyn týyndylarǵa ainaldy.
Kezinde ǵalym, ustaz, qazaqtyń birtýar tulǵasy Zeinolla Qabdolov aǵamyz: «Ánniń ǵumyrly bolýy – ol tek sóz mátinine ǵana bailanysty, ánniń sózi jaqsy bolsa ǵana ándi halyq súiip aitady, ǵumyrly bolady, men sondai ánderdiń mátinin Shómishbaidyń jazǵan án-óleńderinen kórip, sezinemin, ánge mátin jazýdyń sheberi», – dep baǵalaǵan edi.
Dál sondai pikirdi Qazaqstannyń Eńbek Eri, ánshi Roza Rymbaeva da: «Shómishbaidyń óleńine jazylǵan ánder osydan 30-40 jyl buryn jazylsa da, áli kúnge deiin jańa jazylǵan án sekildi, sahnadan túsken joq, óziniń ózektiligin, ómirsheńdigin saqtap keledi», – dep aitqan.
Shómishbai Sariev 1946 jyly 15 sáýirde Qyzylorda oblysy, Aral aýdany, Shómish stansasynda dúniege kelgen. Qambash orta mektebin bitirisimen, Qazaly aýdandyq «Lenin týy» jáne Aral aýdandyq «Tolqyn» gazetterinde qyzmet atqarǵan.
1971 jyly QazMÝ-diń jýrnalistika fakýltetin bitirgen. 1970–1974 jyldary «Qazaqstan» baspasynda redaktor, «Juldyz» jýrnalynda bólim meńgerýshisi, Qazaqstan Respýblikasy UǴA-nyń M.O.Áýezov atyndaǵy Ádebiet jáne óner institýtynda ǵylymi qyzmetker, aǵa ǵylymi qyzmetker bolǵan.
1996 jyly «Qazirgi qazaq lirikasynyń izdenisteri» atty taqyrypta ǵylym kandidaty dárejesin ielendi. «XX ǵasyrdyń jiyrmasynshy jyldardaǵy poeziiasy» atty monografiia jazǵan.
«Ǵashyqtar jyry», «Bozjorǵa» atty avtorlyq beinetaspasy jaryq kórdi. G.Gýlia, O.Berggolts, I.Abashidze, S.Vikýlov, A.Dementev, F.Alieva, R.Rojdestvenskii, M.Emineský, t.b. aqyndardyń óleńderin qazaq tiline aýdarǵan.
Alǵashqy jyr jinaǵy 1974 jyly «Baldáýren» degen atpen jaryq kórgen. Sodan bergi aralyqta qazaq, orys tilderinde jiyrmaǵa tarta jinaǵy shyqqan. 1994 jyly «Jazýshy» baspasynan tańdamaly óleńder tomdyǵy, 1992 jyly «Súiinshi» degen atpen án óleńderi jeke jinaq bop basylǵan.
