Mektep oqýshylaryna arnalǵan árbir pán boiynsha qaýymdastyq qurylady. Bul týraly QR Bilim jáne ǵylym birinshi vitse-ministri Sholpan Karinova aitty, dep habarlaidy QazAqparat.
«Búgingi kúngi bilim salasyndaǵy negizgi problemalar - kei muǵalimderdiń óz mamandyǵy boiynsha jumys istemeýi, shaǵyn jinaqty mektepterde muǵalimderdiń jetispeýshiligi jáne olardy ádistemelik kabinetter tarapynan qoldaý jumystarynyń jetkiliksizdigi. Osylardy eskere otyryp, aldaǵy jyly jasalatyn jumystarǵa toqtalaiyn. Birinshiden, muǵalimder men ádiskerlerdiń biliktilik talaptaryn qarastyrý kózdelgen. Ekinshiden, muǵalimderdi joǵary bilim deńgeiinde, kásibi-tehnikalyq deńgeiinde negizgi oqytý baǵdarlamalaryn qaita qarastyrý jumystaryna bailanysty barlyq kýrstyq baǵdarlamalar jańartylady», - dedi ol ministrliktiń keńeitilgen alqa otyrysynda.
Sonymen birge Sholpan Karinova muǵalimderdiń attestattaýdan ótý kezindegi ulttyq testileý júiesiniń tapsyrmalaryn retteý de qolǵa alynatyndyǵyn aitty.
«El Prezidentiniń tapsyrmasymen muǵalim tapshylyǵy bar jáne bilim salasynda, bilim sapasynda alshaqtyq bar óńirlerge muǵalimderdi, sapaly muǵalimderdi jiberý, onyń ishinde joǵary oqý oryndarynyń úzdik túlekterin jiberý jumystary júrgiziledi. Sonymen birge árbir pán boiynsha pándik qaýymdastyqtar qurylyp, myqty muǵalimderdiń óz tájiribelerimen bólisý, muǵalimderdiń oqytý ádisterin qoldaý jumystary júrgiziletin bolady. Daryndy balalardy daiyndaityn muǵalimdermen jumys jalǵasady», - dedi birinshi vitse-ministr.
