«Kásipodaqtar kúni» merekesine orai QR Kásipodaqtar federatsiiasynyń tóraǵasy Eraly Toǵjanov Arys qalasyna arnaiy kelip, oblys ákimi Ómirzaq Shókeevtiń keýdesine tósbelgi taqty, dep habarlaidy "Ult aqparat" óńir basshysynyń baspasóz qyzmetine silteme jasap.
«Halyqtyń qamy úshin sińirgen eńbegińiz eren. Ony búkil halyq bilip otyr. Arystaǵy apat oryn alǵanda 50 myń halyqty qaýipsiz jerge kóshirip, qańyrap qalǵan tutas bir qalany aiaqqa turǵyzý qyrýar is. Siz syn saǵatta sabyr saqtap, eren eńbektiń úlgisin kórsettińiz. Búkil halyq bir adamdai jumylyp, eńbek etti. Elińizdiń aldynda abyroiyńyz asqaqtai bersin», - dedi QR Kásipodaqtar federatsiiasynyń tóraǵasy Eraly Toǵjanov.
Sondai-aq, Arys qalasyn qalpyna keltirý jumystaryna atsalysqan birqatar azamattar QR Premer-Ministriniń jáne Respýblikalyq Kásipodaqtar federatsiiasynyń «Alǵys hatymen», «Kásipodaqtarǵa sińirgen eńbegi úshin» tósbelgisimen marapattaldy. Olardyń tiziminde Arys qalasy áskeri bóliminiń tseh tehnigi, kásipodaq músheleri, qurylysshylar men vagon paidalaný deposynyń ókili bar. Jiyn Túrkistan oblysy ákimdigi men Qazaqstan Respýblikasy Kásipodaqtar federatsiiasy arasynda áleýmettik áriptestik memorandýmyna qol qoiý rásimine jalǵasty. Kásipodaqqa senim artqan azamattardyń jalpy sany boiynsha Túrkistan oblysy elimiz boiynsha kósh bastap tur.
