«Elimizde «Nur Otan» partiiasynyń ishki praimerizi bastalyp ketti. Bul – demokratiia men azamattyq qoǵamdy damytýǵa serpin beretin, naǵyz kóshbasshylardy qarapaiym el arasynan tabýdy kózdeitin igi qadam», - dep jazdy Túrkistan oblysynyń ákimi Facebook paraqshasynda.
«Byltyr partiia Tóraǵasy, Elbasy N.Nazarbaev «Senim. Dialog. Bolashaqqa nyq qadam – «Nur Otan» partiiasynyń 7 serpini» atty partiia jumysyn júieli jańǵyrtý baǵdarlamasyn usynǵan bolatyn. Osy baǵdarlamaǵa sáikes qolǵa alynǵan praimerizge qoǵam qyzyǵýshylyq tanytyp otyr. Sebebi, irikteýde úmitkerlerge teń múmkindik berilgen. Erekshe aita keterligi, áielder qaýymy men jalyndy jastarǵa da saiasatqa jol ashylyp otyr», - dep atap ótedi Ómirzaq Shókeev.
Oblys ákiminiń aitýynsha, qoǵamda óz pikirin ashyq aityp, el máselesin qozǵap júretin azamattar bar. Bul praimeriz arqyly sondai azamattar partiianyń kadrlyq rezervine alynyp, jergilikti deńgeidegi máslihattarǵa, Májiliske usynylady.
«Myqty liderler – myqty partiia» qaǵidasy basshylyqqa alynatyn saiasi dodany ashyq, taza ári ádil ótkizý – mindetimiz. «Nur Otan» partiiasynyń Túrkistan oblystyq filialy praimeriz ótkizýge birneshe aidan beri daiyndyq júrgizdi. Aýdan, qalalarda uiymdastyrý komitetteri qurylyp, jumys istep jatyr. Qazir Túrkistan oblysynda 80000-nan astam partiia múshesi bar. 245 bastaýysh partiia uiymy tirkelgen. Praimerizde partiia músheleri úmitkerlerge daýys berip, sol arqyly kadrlyq rezerv jasaqtalady. Jalpy oblysta daýys berýge jáne debattar ótkizýge 209 oryn ázirlengen.
Biyl elimiz pandemiianyń saldarynan qiyn kúnderdi bastan ótkerip jatyr. Karantin talaptary qatań saqtalýy tiis. Sondyqtan praimerizde onlain túrde tirkelýge jáne daýys berýge jaǵdai jasalyp otyr.
Qazaq halqynyń qabyrǵaly qairatkeri Ahmet Baitursynulynyń «Ult jumysy – úlken jumys: úlken jumysqa kóp jumysker kerek» degen sózi bar. Ultqa adal qyzmet etýdi perzenttik boryshym dep esepteitin bolashaq kóshbasshylar men qairatkerler Túrkistan oblysynda kóp ekenin bilemiz. Endeshe eldik máselelerge alańdaityn, jigerli, bilimdi, namysty azamattardy praimerizge belsendi túrde qatysýǵa shaqyramyn»,- dep túiindeidi óńir basshysy.
