Túrkistan oblysy Maqtaaral aýdanyndaǵy qalyptasqan tótenshe jaǵdaidy oblys ákimi Ómirzaq Shókeev áýeden baqylap kórdi. Aimaq basshysy oblystyq TJD bastyǵy Nurǵali Júnisovpen birge qaýiptiń aldyn alý máselelerin talqylady, dep habarlaidy QazAqparat.
«Qazir endi Ózbekstan ministriniń resmi málimdemesine sáikes, sý basqan óńirdiń barlyǵyn qaitadan aralap, kórip shyǵamyz. Eger taǵy sý basý qaýpi bolmasa, ondaǵy barlyq turǵyn úilerdi politsiia qorǵaidy. Ázirge turǵyndardyń maly qaýipti aimaqtan túgel shyǵaryldy. Eshqandai shyǵyn joq. Barlyǵy uiymdasqan túrde rettelip, óz qalpyna keledi. Bul - jergilikti aýqymdaǵy tótenshe jaǵdai. Sondyqtan bul jerde Arystaǵy tájiribege sai algoritmde jumys isteimiz. Bári uiymdasqan túrde retteledi, qalpyna keledi. Bul tótenshe jaǵdaidy igerýge oblystyń tolyq múmkinshiligi bar»,- dedi Ómirzaq Shókeev.
Esterińizge sala keteiik, 1 mamyrda Sardoba sý qoimasy bógetin sý shaiyp ketýine bailanysty Ózbekstannyń Syrdariia oblysyndaǵy eldimekendi sý basty.
Sonyń saldarynan Maqtaaral aýdanynda shekara mańyndaǵy birneshe kollektor sýǵa tolyp qalǵan. Maqtaaraldaǵy ortalyq kollektordan sý tógilip, Jeńis, Jańa turmys aýyldaryn sý alyp ketti. Oblystyq mańyzy bar «Myrzakent - Jeńis - Jańa turmys» avtomobil jolyn sý basyp, kólik júre almaýda. Tórt aýyldan 5400 adam qaýipsiz jerge kóshirilgen.
Sondai-aq Túrkistan oblysynda sý tasqyny qaýpi tóngen 3 aýyldyń halqy evakýatsiialanyp jatyr. Oblys ákimi Ómirzaq Shókeev halyqty sabyrǵa shaqyryp, tótenshe jaǵdaidy retteýge aimaqtyń tolyq múmkindigi bar ekenin aitty.
