Túrkistan oblysynda Ómirzaq Shókeevtiń tóraǵalyq etýimen ótken aptalyq apparat jinalysynda biýdjet qarajatynyń igerilý barysy aityldy, dep habarlaidy "Ult aqparat" Túrkistan oblysy ákiminiń baspasóz qyzmetine silteme jasap.
Jergilikti biýdjettiń tiimdi oryndalýy men memlekettik aktivterdiń maqsatty jumsalýy oblys basshysynyń jiti baqylaýynda. Osy oraida otyrysta birqatar aýdan ákimderi men basqarma basshylary oblys ákiminiń qatań synyna ushyrady.
«Biýdjet qarjysyn maqsatty igerý - basty nazarda. Atalǵan qarjylardy Úkimetten bóldirý úshin qanshama ýaqyt pen kúsh jumsalady. Al sizder kelip turǵan qarjyny igere almaisyzdar. Ondai aýdan, qala ákimderi men basqarma basshylarynyń sebebin - syltaý dep túsinem», –dedi Ómirzaq Estaiuly.
11 aidyń qorytyndysymen biýdjetten bólingen qarjyny óz merziminde ári sapaly igermegen jaǵdaida, jaýapty tulǵalarǵa tártiptik shara qoldanylady.
Jinalysta kóterilgen Túrkistandy kógaldandyrý týrasynda atqarylyp jatqan jumystar da oblys ákiminiń kóńilinen tolyq shyǵa qoimady. 32 sektorǵa bólingen shahardaǵy aǵash otyrǵyzý, kúl-qoqystan tazartý sharalaryn qatań baqylaitynyn qadap aitqan aimaq basshysy, tiisti sala basshylaryna basa mán berýdi qajet etetin tustardy atap, naqty tapsyrmalar berip men mindetter júktedi.
