Shyǵys Qazaqstan oblysynda sý tasqynymen kúreske qajetti qural-jabdyqtar jetispeidi. Bul týraly Úkimettiń selektorlyq rejimdegi otyrysynda Shyǵys Qazaqstan oblysynyń ákimi Danial Ahmetov aitty, dep habarlaidy QazAqparat.
«Tótenshe jaǵdailar departamentiniń birde-bir qural-jabdyǵy joq. Mysaly, motopompa. Jospar boiynsha ol oblysta 249 bolýy kerek. Al bizde 55-i ǵana bar - 22 paiyz. Kóshpeli motopompa - eń keregi osy ǵoi, norma boiynsha 112 bolýy kerek. Al bizde ekeý ǵana. Qaiyqqa toqtalaiyq, ol 69 bolýy qajet. Al bizde 14 qaiyq qana bar. Jol talǵamaityn kólik, salaidaǵysh 55 bolýy tiis, bireýi de joq», - dedi oblys basshysy.
Sonymen qatar Danial Ahmetovtiń dereginshe, óńirde tótenshe jaǵdailar qyzmetinde normaǵa sáikes 55 kólik bolýy shart. Al qazirgi kezde oblysta tek 9 kólik bar.
«Al endi jigitterimiz sýdyń basynda júr ǵoi. Olarǵa gidrokombinezon kerek. Jospar boiynsha 1 myń bolýy kerek. Al búkil oblysta 86 ǵana. Osy jaǵdaiǵa jai qaramaiyq. Biylǵy jyldyń basynda 300 mln teńge bóldik. Qazir taǵy 200 mln bólip otyrmyz. Biraq osy máseleni birge sheshýge múmkinshilikti taýyp berseńiz», - dedi Danial Ahmetov Premer-Ministr Baqytjan Saǵyntaevqa qarata.
Osy rette Úkimet basshysy bul usynystyń óte oryndy ekenin basa atap ótti.
«Asqar Uzaqbaiuly, (QR Premer-Ministriniń orynbasary Mamin) qajetti memlekettik organdarmen birlese otyryp, qarap shyǵyńyz. Bul tek qana Shyǵys Qazaqstan oblysyndaǵy jaǵdai emes. Barlyq oblystarda sondai bolýy múmkin», - dedi Baqytjan Saǵyntaev.
