Senatorlar Ridderdegi órtten zardap shekkenderge kómek kórsetý úshin bir kúndik eńbekaqysyn aýdardy, dep habarlaidy "Ult aqparat" zań shyǵarýshy organnyń baspasóz qyzmetine silteme jasap.
Shyǵys Qazaqstan oblysynyń Ridder qalasynda bolǵan alapat órttiń saldarynan ondaǵan úi tolyqtai órtenip ketti. Ókinishke qarai, qaiǵyly jaǵdai adam ólimine ákelip soqty.
Qazaqstan Parlamenti Senatynyń depýtattary men Apparat qyzmetkerleri órtten qaza tapqandardyń týystary men jaqyndaryna qaiǵyryp kóńil aitty jáne zardap shekkenderdiń tezirek saýyǵyp ketýine tilektestigin jetkizdi.
Elimiz Prezidentiniń tapsyrmasy boiynsha Úkimet pen Shyǵys Qazaqstan oblysynyń ákimdigi qazir órtten zardap shekken qala turǵyndaryna kómek kórsetýde jáne olardy baspanamen qamtamasyz etý jumysymen ainalysyp jatyr.
Osyndai qiyn kezeńde senatorlar bir kúndik eńbekaqysyn órtten zardap shekkenderdiń kómek qoryna aýdarý jáne Ridder turǵyndaryn qoldaý jóninde sheshim qabyldady.
Esterińizge sala ketsek, buǵan deiin májilismender bir kúndik jalaqysyn Ridderdegi órtten zardap shekkenderge aýdarǵan bolatyn.
Aita keteiik, 10 mamyr kúni ShQO-daǵy Ridder orman sharýashylyǵynda órt shyqty. Dala órti 310 gektar aýmaqty sharpyp, 1 adam qaza tapty. Órtke bailanysty shuǵyl jeli iske qosyldy.
Memleket basshysy Úkimet pen Shyǵys Qazaqstan oblysynyń ákimdigi órtten zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy.
QR Ishki ister ministrligi Shyǵys Qazaqstan oblysy Ridder qalasyndaǵy órt faktisi boiynsha sotqa deiingi tergeýdi bastady.
Búgin Shyǵys Qazaqstan oblysynyń politsiia qyzmetkerleri alapat órtke qatysty kúdiktini ustady.
